Piviusulersaarut takutinneqanngitsuulersoq

Guitarertartuusimasoq Karl Sivertsen pillugu piviusulersaarut Aasianni unnugu takutinneqartussaagaluarpoq.

Christian K. Elsnerimit Kâle Sivertsen, guitarertartoq erinniortorlu, pillugu piviusulersaarusiaq, "Sinnattoraangama Takusarpagit" Aasiaat katersortarfiani unnugu nalunaaqutaq 19.00 aamma nalunaaqutaq 20.30 takutinneqartussaagaluarpoq.

Kommune Qeqertalilli maanna aalajangerpoq pisussaq taamaatinneqarallassasoq, illoqarfimmi coronamik napparsimasoqarnera pissutigalugu. Kommune Qeqertalik Facebookimini taama ilisimatitsivoq. Kommuni nalunaarpoq piviusulersaarut piffissami allami takutinneqarumaartoq.

Piviusulersaarut illoqarfinni allani nunaqarfinnilu pilersaarutit malillugit suli takutinneqartussaavoq.

Aasianni innuttaasoq ataaseq COVID-19-imik napparsimalersimasoq ippassaq paasineqarpoq. Tassunga atatillugu Inatsisartuni Aningaasaqarnermut Akileraartarnermullu Ataatsimiititaliami ilaasortaasut Nakorsaaneqarfimmit angerlarsimagallartussanngortinneqarput, napparsimasup qanigisatut ilaqutaata ataatsimiititaliaq ataatsimeeqatigisimammagu.

Powered by Labrador CMS