Sulisup peersitaaneranut suliareqqitassanngortitsinermi IMAK ajugaasoq
Nunatta Eqqartuussisuuneqarfiata erseqqissarpaa sulisumik peersitsineq tunngavissaqanngitsoq. Sulisoq kommunimit suliunnaarsitaasimavoq sulisoq atorfeqarnermi nalaani kommuni qimallugu nuummat.
Nunatta Eqqartuussisuuneqarfiata IMAK-ip ilaasortaq sinnerlugu suliareqqitassanngortitsinera eqqartuussinikkut ulloq 5. oktober 2020 aaliangiiffigineqarmat IMAK sajugaavoq. Suliami pineqarpoq IMAK-imi ilaasortaq, januarimi 2019-imi sulisitsisuminit peersitaasimasoq.
Kommunip sulisumik peersitsinermut tunngavilersuutigaa sulisoq napparsimanermi nalaani Danmarkimut nuussimanera, najukkanilu taamaasillugu allanngortissimallugu.
- Kommuni isumaqarami najukkamik nuutitsineq pisussaaffimmik, tassa atorfeqarnermik, sumiginnaanerusoq, IMAK tusagassiorfinnut taama nalunaaruteqarpoq.
IMAK taama aalajangernermut isumaqataanngilaq, suliarlu eqqartuussivimmi suliassanngortillugu.
Kommune akiliissaaq
Suliami Nunatsinni Eqqartuussiviup kommuni taperserpaa. Suliarli IMAK-imit suliassanngorteqqinneqarpoq. Suliassanngorteqqinneqarnerani Nunatta Eqqartuussisuuneqarfiata IMAK-ip suliamik saqqummiinera malillugu erseqqissarpaa, sulisup najukkaminik allanngortitsinera suliffimmit peersitaanissamik tunngaviliinngitsoq.
Taama aalajangernermi kommunip sulisuminut sumi najugaqarnissamik piumasaqarsimannginnera tunngavilersuutigineqarpoq.
- Nunatta Eqqartuussisuuneqarfiata aaliangerpaa sulisumik peersitsineq tunngavissaqanngitsoq, taamaattumik kommuni sulisorisimasaminut naammattumik akiliisariaqartoq.
- Taamaalilluni naqissuserneqarpoq kommunimi tassani suliffeqaraanni pinngitsoorani tassani kommunimi najugaqartariaqarneq piumasaqaataanngitsoq. Tamannami ilumoorpoq, IMAK-ip siulittaasua Birthe Møller Therkildsen tusagassiorfinnut nalunaaruteqarluni allappoq.