Sialuk: Juulimi aatsaat taamak sialoqartigisimasoq
Sisimiuni Kangerlussuarmilu juulip qaammataani ima siallersimatigaaq allaat rekortiliisoqarsimalluni, DMI ilisimatitsivoq.
Sisimiuni innuttaasut juuli qaammat isugutallunilu sialoqarsimasoringunikku ilumoorluinnarput.
Illoqarfimmi juulip qaammataani 205 mm-inik sialoqarsimavoq, ukiuni 1981-imiit 2010-mut agguaqatigiissillugu sialoqartarnera eqqarsaatigissagaanni sisamariaammik annertutigisumik sialoqarsimagami.
- Ingasalluinnarpoq. Sisimiuni juulip qaammataani agguaqatigiissillugu 45,3 mm-inik sialoqartarpoq, DMI-mi silasiortoq John Cappelen Sermitsiaq.Ag-mut oqarpoq.
205 mm-inik sialoqarsimanera juulimi rekortiuvoq nutaaq. DMI 1961-imili Sisimiuni sialummik uuttortaasarpoq, siusinnerusukkullu rekortiusoq 114,4 mm-iusimalluni, taannalu 2007-imi juulip qaammataani uuttortarneqarsimavoq.
Marloriarluni siallersimasoq
John Cappelen oqaluttuarpoq, Sisimiuni marloriarluni siallersimasoq – siullermik juulip arfineq-pingajuata missaani, tullianilu juulip 27-iata missaani.
Sialoqarnerata kitaani sumiiffiit arlallit sunnersimavai. Aamma Kangerlussuarmi nutaamik rekortiliisoqarsimavoq.
DMI naapertorlugu tassani juulip qaammataani 85,7 mm-inik siallersimavoq.
Nalinginnaasumik sialukinnerusaraluarpoq - tassalu 26,6 mm-inik. Kangerlussuarmi sialoqangaatsiarsimanera qaqutigoortuuvoq, silasiortoq oqaluttuarpoq:
Aamma Nuummi Aasiannilu siallersimaqisoq
- Sila eqqarsaatigissagaanni Kangerlussuaq ”issitumi inoqajuitsutut” oqaatigineqarsinnaavoq. Timmisartoqarfik qanga sananeqarmat tamanna tunngaviusimavoq, timmisartornissamummi silagittuartuummat, nalinginnaasumillu sialoqarpallaartarani, John Cappelen oqarpoq.
Kitaata sineriaani sumiiffiit allat aamma sialoqarsimaqaat, taamaattoq ima ingasatsiginngitsumik allaat rekortiliisoqarani.
Assersuutigalugu Nuummi 120,5 mm-inik sialoqarsimavoq, Aasiannilu 71 mm-inik, tassa nalinginnaasumik 24,7 mm-inik sialoqartarneranit pingasoriaatingajammik sialoqarsimavoq.
John Cappelen naapertorlugu oqaatigiuminaappoq, rekortiliinerit silap pissusaata allanngoriartorneranik pissuteqarnersut:
- Ilaanni masannartoqarlunilu panernartarpoq, silaannartarput juulimi ilaannikkooriarluni sialoqartitsisaqaaq, taanna oqarpoq.
Avannaani Tunumilu sialoqarsimanngitsoq
Akerlianik nunami sumiiffiit ilaat qaqutigoortumik sialoqarpallaarsimanngillat. Tasiilaq nalinginnaasumik 47,2 mm-nik sialoqartartoq 3,1 mm-inik sialoqarsimavoq. DMI-mi silamut atatillugu allattukkani takuneqarsinnaavoq ulluni marluinnarni sialoqarsimasoq – tassalu juulip aallaqqaataani qulingiluaanilu.
Aamma Pituffik juulimi imatut sialoqarsimanngilaq. Juuli tamakkerlugu 1 mm-iinnarmik sialoqarsimagami, John Cappelen oqaluttuarpoq.