SIK: Pilersuisoq nunaqarfinnik inukillisaaqataavoq
Pilersuisoq nunaqarfinni mikinerusuni ullormut nalunaaquttap akunnerini tallimaannarni sulisoqartarnissamik neqerooruteqartarpoq, taamaalilluni ingerlatseqatigiiffik taamalu aamma Namminersorlutik Oqartussat nunaqarfinnik inukillisaaqataapput, SIK-p siulittaasua oqarpoq.
Sulisartut kattuffiani siulittaasup Jess G. Berthelsenip Namminersorlutik Oqartussat KNI-lu Pilersuisup pisiniarfiinik piginnittoq isornartorsiorpai. Jess G. Berthelsen isumaqarpoq, Namminersorlutik Oqartussat KNI aqqutigalugu nunaqarfiit sukkasuumik inuerukkiartortikkaat.
SIK-mi siulittaasup tusagassiorfinnut nalunaaruteqarnermi ilisimatitsissutigaa, kattuffimmi ilaasortarpassuit Pilersuisup pisiniarfiini taamaallaat ullormut nal. ak. tallimani sulisinneqartartut.
SIK naapertorlugu, tamatuma malitsigisaaanik arlallit illoqarfinnut nuunnissartik aalajangertaraat, ulloq naallugu suliffeqarnissamut periarfissagissaarnerummata.
Nal. ak. arfineq-pingasuni sulerusuttut
- Pilersuisumut isumaqatigiinniaraangatta tamatigut kissaatigisarparput pisiniarfinni sulisut il.il minnerpaamik nalunaaquttap-akunnerini arfineq-pingasuni sulisinneqartarnissaat. Pilersuisulli innersuussutigiuagaa tassaavoq Namminersorlutik Oqartussanut kiffartuussinissamik isumaqatigiissummi akuersissutigineqarsimasoq nunaqarfinni mikinerusuni pisiniarfiit taamaallaat nalunaaquttap-akunnerini tallimani ammatinneqartarnissaat, Jess G. Berthelsen allappoq.
Nunaqarfinni innuttaasut amerlassusaat
2020-mi juulip aallaqqaataani Kalaallit Nunaanni innuttaasut 7.165-it nunaqarfinni najugaqarput. Ukiup siulianut sanilliullugu 49-nik ikinnerusut.
2020-mi juulip aallaqqaataani illoqarfinni najugaqartut 49.130-upput. Ukiup siulianut sanilliullugu 202-nik amerlanerusut.
Pissarsiffik: Naatsorsueqqissaartarfik
Pilersuisup pisiniarfii, KNI-mut Namminersorlutik Oqartussanit pigineqartumut ilaapput, Namminersorlutik Oqartussat taamaalillutik akisussaapput, SIK-p siulittaasua oqarpoq:
- Namminersorlutik Oqartussat KNI tamakkiisumik pigisarimmassuk taava oqartariaqarpoq Namminersorlutik Oqartussat peqataasut nunaqarfiit sukkasuumik inuerukkiartornerannut, Jess G. Berthelsen allappoq.
Nukissiorfiit soraarsitsiortorniarnerat unitsinneqartoq
Jess G. Berthelsenip nalunaaruteqarnera pisortat suliffeqarfiutaat pillugit oqallinnermut allamut attuumassuteqarpoq. Sapaatip akunnerani kingullermi Nukissiorfiit digitaliseeriiniarnerat Naalakkersuisunit unitsinneqarpoq.
Nukissiorfiit digitaliseeriinermikkut ukiumut suliffiit 13-it atorunnaarsinniarpaat, pingaartumilli illoqarfinni mikinerusuni qitiusutut sulisut soraarsinneqarniarlutik. Tamannalu Naalakkersuisunit peqataaffigineqarusunngilaq.
Nukissiorfiit allatigut sipaarniartariaqartut, Nukissiuuteqarnermut Naalakkersuisup Steen Lyngep (D) nalunaarutigaa.