Nunarsuarmi tuniluuttoqarneratigut timmisartoqarfissat nutaat aningaasaqarnerat ajorseriarsinnaavoq

Naalakkersuisut Covid-19-ip nunarsuami tuniluunnerata kingunerisaanik aningaasaqarnikkut kinguneqaataasinnaasut pillugit Kalaallit Airportsmik oqaloqatiginnipput.

Nuummi, Ilulissani Qaqortumilu nutaanik timmisartoqarfiliornissaq sioqqullugu, inuiaqatigiit aningaasaqarnerannut kinguneqaataasinnaasunik nalilersuisoqarmat, nuarsuarmi timmisartortitsinermik ingerlataqartunut kingunerlutsitsingaatsiartumik tuniluuttoqalernissaa kialluunniit ilisimasimanngilaa.

Covid-19-p nunarsuarmi tuniluunnerata malitsigisaanik siunissami timmisartoqarfiillu nutaat atorneqarnissamut piareerpata timmisartumik angalasussat ikilissanersut apeqquterujussuuvoq. Tassa Kalaallit Nunaanni sanaartukkat annersaanni aningaasaqarnerup ajorseriarsinnaanera eqqarsaatigineqartaraqarpoq.

Tillie Martinussenip Suleqatigissitsisuneersup paragraf 37 naapertorlugu apeqqutaanut Attaveqaqatigiinnermut Naalakkersuisoq Karl Frederik Danielsen imatut akissuteqarpoq:

Ilaasut mianersortumik amerlissangatinneqartut

- Ullumikkut angallasseriaaseqarnermi angalasartut amerlassusaat taamaaginnarnissaannik naatsorsuuteqarluni, Mittarfiit annertusaavigineqarneranni 3 inuiaqatigiit aningaasaqarnerinut sunniutaasussanik nalilersuineq, Alloriarneq 2, suliarineqarpoq. Imaappoq, ullumikkut angalasartut assigalugit angalasoqartassappat, tamanna inuiaqatigiit aningaasaqarnerinut pitsaasumik sunniuteqassasoq. COVID-19 sioqqullugu ukiut siuliini angalarsartut, oqaluttuarisaanermi aatsaat taamak amerlitigalutik ukiumut 5 procentit missaannik amerleriarnikuupput, attaveqaqatigiinnermut naalakkersuisoq allappoq.

- Inuiaqatigiit aningaasaqarnerinut kinguneqaataasussanik nalilersuinermi, ilaasut naatsorsuutigisamik amerliartornissaannik naatsorsuutigisamit ilaasut ikileriarsinnaanissaat nammassinnaajumallugu, ilaasut mianersortumik 2 procentiinnarmik amerlissasut– imaappoq oqaluttuarisaanermi aatsaat taamak qaffatsiginerinit appasinnerusumik – nalilerneqarpoq.

- Tassunga ilanngullugu paasissutissiissutigineqassaaq, inuiaqatigiit aningaasaqarnerinut kinguneqaataasussanik nalilersuinermi ukiut 25-t aallaavigalugit misissueqqissaarisoqarmat. 2024-mit siunissami angalatitsinermut COVID-19 qanoq sunniuteqassanersoq maannangaaq ilisimaneqanngilaq, Karl Frederik Danielsen allappoq.

Ingerlatsinissamut pilersaaruteqartoqanngitsoq

Naalakkersuisup oqaatiga, COVID-19-ip suliniutinut kingunerisinnaasai pillugit Naalakkersuisut Kalaallit Airports A/S-imik oqaloqateqartut.

- Apeqqutigineqartup ersarinnerusumik akissuteqarfigineqarsinnaanissaanut, mittarfinnut taakkununnga pingasuusunut ingerlatsinissamut pilersaarutinik nutartigaqanngilaq. Maannangaaq, aamma taakku nutarterneqareerpata, 2024-mi ukiunilu malitsigisaani angallanneq qanoq isikkoqarumaarnersoq oqaatigineqarsinnaanngilaq. Tamanna nunarsuarmi tamarmi timmisartuussinermi atuuppoq, naalakkersuisoq erseqqissaavoq.

Powered by Labrador CMS