Ikuallaavissap inissisimaffissaa isornartorsiorneqangaatsiartoq

Illoqarfiit pingaarnersaata kommuniata ikuallaavissap nutaap inissisimaffissaanut pilersaarutaa, aamma umiarsuarnut atlantikukkoortaatinut umiarsualiviup nutaap eqqaani asfaltiliorfimmik sanaartorniarneq isornartorsiorneqangaatsiarput.

Suliffeqarfissuit, soorlu Royal Greenland, Royal Arctic Line aamma Nukissiorfiit, namminersorlutik suliffeqarfiutillit marluk umiarsuaatileqatigiiffillu Sikuki Harbour peqatigalugit, ikullaavissap inissisimaffissaanut isornartorsiuingaatsiarsimapput, tusarniaarnermullu akissutitik kommunimut peqqussutitalerlugit nassiussimallutikkit.

Sanarfinermut Avatangiisinullu Ataatsimiititaq ataasinngormat suliaq pillugu ataatsimiissismappt, suliarlu sammineqaqisoq Aningaasaqarnermut Inuussutissarsiornermullu Ataatsimiititamut ingerlateqqinnissaa aalajangiussimallugu.

Hammeken isornartorsiuisoq

Royal Arctic Linemit isornartoqartinneqartut arfineq-marluk allattorneqarsimapput, ilaatigullu isumaqartoqarluni nerisassatut tunisassiat ikuallaaviup eqqaani usigiarneqartassappata, avammut tunisartakkat nalikillisinnaasut.

- Tunisassiat taakku ingerlaavartumik pitsaassutsimikkut misissorneqartarneranni, tamatuma nalunaarsorneqartalernissaa ilimanarsinnaavoq, tusamaasaanermullu akorngusiisinnaalluni, taamalu avammut tunisartakkatta nalinginut ajoqusiisinnaallutik, RAL-imi pisortaq Vermner Hammeken allappoq, uingasunillu naqinnilinnik allalluni nangilluni:

- Avammut tunisartakkat 5%-imik nalikillissappata, ukiumut tamanna 175 millioner koruuninik naleqartassaaq. Ajutoornermik kinguneqarsinnaasumik iliuuseqarneruvoq.

Verner Hammekenimit annilaanngatigineqarpoq, teknikkikkut atortut umiarsualivimmik inerisaaniarnermut aamma toqqaannartumik avammut tunisaqartarnermut aporfiusinnaanerat.

- Tamanna siunissami inuiaqatigiinnut tamanut aningaasartuutaangaatsialersinnaavoq, piffissammi qaninnerup ingerlanerani sumiiffinni allani umiarsualiviliortoqarsinnaanngimmat, tunngavilersuutit isorinnittut arlallit ilaat taamatut nipeqarpoq.

Sumiiffiup agguataarneqarsimanera

Qeqertaq naaralaartitsiveqarfik aallaqqaammut Inuussutissarsiutitut ingerlatanut umiarsualiveqarnissamullu atugassiaasimangaluarpoq. Pilersaarutaasimavoq sumiiffik agguataarneqassasoq, teknikikkut atortunut inissaqartillugu.

Attaveqaqatigiinnermut Naalakkersuisoqarfimmit aamma isumaqartoqarpoq, allannguineq umiarsualivimmik alliliinissamut periarfissanut akorngusiissasoq.

- Umiarsualiviup kujataata tungaanut umiarsualivimmik quersuartalimmik, aalisakkerivittalimmik, qerititsivittalimmik il. il. siunissami alliliinissamut, eqqakkanik sineriammiit Nuummukaanneqarsimasunik isumaginnillunilu ikuallaasarnissaq naapertuuppasinngilaq. Asfaltiliorneq, eqqqakkanik ikuallaasarneq, eqqakkanik uningasuuteqartarneq inuussutissanillu tunisassiorneq immikkoortinneqartariaqarput, eqqakkat tikkisa, uumasut ajoqutaasartut mingutsitsinerullu ajoqutaasinnaaneri eqqarsaatigalugit, naalakkersuisoqarfik allappoq.

- Inatsisartut Qeqertap naaralaartitsiveqarfiusup Sikukip alliliinissamut periarfissaanut minnerpaamik atorneqarnissanik isummernerat pingaaruteqarluinnarpoq. Eqqagassalerinerup siunertaq tamanna aporfilissappagu, nunamut tamarmut politikkisssatut aalajangiussamut naapertuutinngilaq, Attaveqaqatigiinnermut Naalakkersuisoqarfimmit tusarniaanermut akissuteqarnermi erseqqissaatigineqarpoq.

Dioxinimimmi aniatitsineq?

Sikuki Harbourimit amigaatigineqarpoq, ”eqqakkat tikkisa, uumasut ajoqutaasartut, mingutsitsineq dioxinimillu aniatitsineq pillugit nassuiaasoqarsimannginnera, taakkumi peqqissutsimut sunniuteqarsinnaapput, inuussutissanik containereqarfimmilu qanittumiittumi uninngasuutinik allanik mingutsitsisinnaapput, taamalu aalisarnermi MSC-mik allagartaqarnermut ulorianartorsiortitsilersinnaallutik aamma umiarsualiviup inerisaqqinneqarnissaanut aporfiliisinnaallutik”.

Royal Greenlandimit annilaanngatigineqarpoq, pilersaarutip malitsigisaanik ”Kalaallit Nunaanni imminut napatittut annersaata pisariaqartinneqartumik allilerneqarnisaanut periarfissat kiisalu aalisakkeriviup allilerneqarnissaanut periarfissat annikillissapput”.

Aalisakkerivimmit oqaatigineqarpoq – allat assigalugit – ikuallaavissaq asfaltiliorfissarlu Isertitsiviup nutaap eqqaanut inissinneqartariaqaraluartut, taakungami aqqusineqareerpoq aamma Isertitsiviup timmisartoqarfissallu nutaap ikuallaaviit kissarnermik sinneqartoorutaannit iluaquserneqarsinnaammata.

Aningaasartuuteqarnerulerneq

Nukissiorfiit teknikikkut atortut ingerlatsinermilu pissutsit arlallit 100 millioner koruunit angungajallugit naleqartut taakkartorpaat. Pilersuisutullu ingerlatseqatigiiffiup paasisinnaanngilaa, eqqakkat sooq Nuummut assartoqarneqartassanersut, illoqarfimmi minguitsumik erngup nukinganik atuisuummat. Aamma paasisinnaanngilaat sooq Kalaallit Nunaanni sumiiffinni assigiinngitsuni uuliamik ikuallaasarneq annikillisarniarlugu, najukkani eqqakkat ikuallanneqarneq ajornersut.

Nuummi innuttaasoq Thomas Riis aamma qaammatini arlalinni qaartiterinermik isornartorsiuivoq.

- Qaartiterinerit immeeqqittarnerillu pilersaarummut atuuttumut akerliulluinnarput, taamalu inerteqqutaallutik. Nunaminertanut tunngatillugit oqartussat sulineq qangali unitsissimasussaagaluarpaat pinerluuteqarsimasorlu politiinut unnerluutigalugu, tamannali aatsaat pisinnaagunarpoq sanaartortitsisoq kommuniunngikkaangat. Kommuni suliaqartillugu oqartussaaqataaneq atorunnaartarpoq, Thomas Riis oqarpoq, nangillunilu oqaatigalugu, pilersaarutip "akueriuminangortitap" pinerluutaareersimasoq pillarneqanngittoortissagaa.

Oqartussaaqataanermut ataqqinninnginneq

Taassuma tamanna oqartussaaqataanermut ataqqinninnginnertut taavaa.

- Oqartussat iliuuseqartarnerannut tatiginninneq inatsimmullu ataqqinninneq tamatuma ajquserpaa. Kommuni inatsimmik nammineerluni malinninngippat, sooq allat uagut inatsimmik malinnissaagut, Thomas Riss tusarniaarnermut akissuteqarnermini aperivoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS