Chemnitz festivalimut itigartinneqarneq pillugu: Sianilluanngilaarneruvoq
Assiliisartup Jørgen Chemnitzip filmip piviusulersaarutip ”Kampen om Grønland"-ip, Canadami festivalertitsisoqarnerani takutinneqarnissamut, ilitsersuisup nunap inoqqaavinit kingoqqisuunnginnera patsisigalugu itigartinneqarsimanera pikkuginngilluinnarpaa.
Filmi piviusulersaartut, Kampen om Grønland, filmimi ilitsersuisup nunap inoqqaavinit kingoqqisuunnginnera tunngavilersuutigalugu filmfestivalimi takutinneqarnissamut itigartinneqarsimavoq.
Assiliisartoq Jørgen Chemnitz Nuummeersoq filmimik suliaqaqataasimavoq, taasumalu Imaginativep festivalertitsinerani filmip takutinneqarnissaata itigartitsissutigineqarsimanera ”sianilluanngilaarnerunerarpaa”.
- Isumaqarpunga tamanna uggornartoq sianilluanngilaarnerusorlu. Filmip oqariartuutaa pingaartinneqartariaqaraluarpoq, kina filmiliortuusimanersoq pinnagu, Jørgen Chemnitz oqarpoq.
Ilitsersuisut pillugit malittarisassat nutaat
Imaginative-festivali filminik, nunat inoqqaavinit suliarineqarsimasunik takutitsisarfiuvoq. Kampen om Grønlandip suliarineqarneranut kalaallit arlallit peqataasimapput, tamannali naammassimanngilaq.
Festivalimmi piumasaqaat nutaat atuutsilersimavaa, tassa ilitsersuisut nunat inoqqaavinit kingoqqisuunissaat. Festivali itigartitsinini pillugu mailikkut Jørgen Chemnitzimut paasissutissiilluni allassimavoq.
Det Danske Filminstitutimi pisortaq Claus Ladegaard Jyllands-Postenimut oqarsimavoq, "filmiliortarnerup silarsuaani ukioq manna annertuumik atugaalersimasoq", filmit inuiannut aalajangersimasunut tunngassuteqartut inunnit filmimi pineqartunit sulairineqarsimanngikkaangata itigartinneqartarnerat.
Chemnitz: Uggornaqaaq
- Tamanna paasisinnaanngilluinnarpara. Filmimi pingaarnerpaavoq, aamma festivali nunap inoqqaavi pillugit oqaluttuanik saqqummiussisartussatut pilersitaavoq.
- Kia suliarisimaneraa pissutigalugu itigartinneqarnera uggornaqaaq, Jørgen Chemnitz oqarpoq.
Imaginative-festivalip mailikkut Jørgen Chemnitzimut, festivalit allat filminut tunngatillugit Imaginativetut piumasaqaateqanngitsut innersuussutigisimavai.
Film.gl-imi siulittaasoq: Naammagittaalliorneq allamut sangutinneqarpoq
Film.gl-imi siulittaasup, kalaallit filmiliaannik tapersersuisartup tupaallaatiginnginnerarpaa, Kampen om Grønlandip Imaginativemit itigartinneqarsimanera.
Klaus Georg Hansenip KNR-imut oqaatigaa, ilitsersuisup Kenneth Sorentop filmiliaminik Imaginative-festivalip itigartitsisimanera pillugu naammagittaalliuutini allamut sangutikkaa:
- Imaginenativerpiamut tunngaviuvoq, nunat imoqqaavinit filmiliat takutinneqartarnissaat, nunat inoqqaavi pillugit filmialiaanngitsut, nunalli inoqqaavinit filmiliat, Klaus Georg Hansen KNR-imut oqarpoq.