Tunumi sukkanerusumik internetseqalissasoq
Tele-Postip SES Networks suleqatigalugu, attaveqaatinik sukkanerujussuarnik, satellitsikkut attaveqaatilinnut pitsanngorsaataasussanik pilersitsinissaa Tunumi innuttaasut qilanaarisinnaavaat.
- Nuannaarutigalugu nalunaarutigissavara internetsimut aaqqiissutit nutaat pillugit killiffimmut pingaarutilimmut pinerput, pisisartutsinnullu, sumiiffinni imaatigut kabelimit attaveqanngitsuniittunut, pitsaanerusunik periarfissanik pilersitsinerput.Tamanna alloriarneruvoq siulleq, innuttaasunut tamanut internetsimut atuisuuffinnik nutaanik pilersitsisoq, Tele-Postimi pisortaaneq Kristian Reinert Davidsen tusagassiorfinnut nalunaaruteqarnermi oqarpoq.
Qaammataasanut attaveqaatit nutaat
Ingerlatseqatigiiffiup ilisimatitsissutigaa, patajaattumik attveqartitsinissaq qulakkeerniarlugu suliaq imaannaanngitsuusoq, SES Networksimilli suleqateqarnikkut aaqqiissutissarsisoqarsimavoq, qaammataasanut attaveqaatissap nutaap pilersaarutit malillugit ukioq manna kingusinnerusukkut atuisunut nutaanut atuutsitsilersinnaasumik.
- Tulluusimaarutigaarpullu Tunumi innuttaasunut internetsimik qaffasissumik pitsaassusilimmik tunniussisinnaanerput, Antonio Bove, Fixed Data Sales Europeimi SES Networksimi pisortaq oqarpoq.