NAKUUSA Qanaami meeqqat isummersorfissaannik pilersitsiniartoq
Qaanaami meeqqat isummersorfiat illoqarfimmi meeqqat inuusuttullu oqaaseqartartorissavaat, illoqarfimmi qanoq atugaqarnertik pillugu kommunimut Namminersorlutillu Oqartussanut oqaluttuartartussaq.
NAKUUSA-mi sulisut aggustusip qaammataa aallartippat Qaanaamukassapput, meeqqat isummersorfissaannik pilersitsiartorlutik, isummersorfissap taaguutigissavaa ”Avanersuarmi Meeqqat Isummersorfiat” (’Børnerådet i Avanersuaq’).
NAKUUSA Namminersorlutik Oqartussat UNICEF Danmarkillu meeqqat pisinnaatitaaffiinik pitsaanngorsaanissamik isumaqatigiissutaannut tunngatillugu suliaqartartoq allappoq.
- NAKUUSA-mi pingaarnerpaatut suliassaavoq, meeqqat isumaannik oqaasererusutaannillu oqartussanut eqqortunut ingerlatitseqqittarnissaq, meeqqammi tusaaneqarnissaminnut pisinnaatitaaffeqarput, NAKUUSA-mi suliniuteqarnermi psiortaq Mia Skifte Lynge oqarpoq.
Meeqqat isummersortarfii meeqqanik 13-iniit 17-inut ukiulinnik inuttaqartinneqarput, taakkulu meeqqat pisinnaatitaaffiinut tunngassutilinnik suliaqartartussaallutillu ilisimasaqarnerulersitsiniaasussaapput, kiisalu meeqqat atugaat pillugit kommuninut Namminersorlutillu Oqartussanut saqqummiisartussaallutik.
Meeqqat isummersorfiisa arfineq-marlussaat
NAKUUSA.mi Meeqqat isummersorfii kommuninut attuumassuteqarput, maannakkorpiarlu meeqqat isummersorfii arfiniliupput – kommunit tamarmik Tunulu meeqqanut isummersorfeqarput. Qaanaami meeqqat isummersorfeqalernerisigut maanna katillugitk arfineq-marlunngorput, sulianiaqatigiiffimmit ilisimatitsissutigineqarpoq.
- Angalanissatsinnut, minnerunngitsumillu meeqqat inuusuttullu naapinnissaannut qilanaarpugut. ”Avanersuarmi Meeqqat Isummersorfiat”, nunatta kusanarluinnartup avannarpasinnersaata ilaani oqaaseqartartussaq atuutilerpat, meeqqanik suleqateqarnissarput qilanaaraarput.
- Taamatut pilersitsinitsinni aamma meeqqat Kalaallit Nunaani tamarmeersut attaveqatigiissilerpavut, meeqqammi isummersorfiinut ilaasortaanermi attaveqaateqartoqartalertarmat, Mia Skifte Lynge oqarpoq.