BankNordikip Kalaallit Nunaanni immikkoortortaqarfia ingerlalluartoq

Banknordikip ukiup affaanu naatsorsuutini ullumi saqqummiuppai, akileraarutillu peereerlugit 74 millioner koruuninik sinneqartooruteqarsimalluni.

Kalaallillu Nunaanni immikkoortortaqarfik aningaaseriviup angusaanut annertuumik tapertaasimavoq:

- Kalaallit Nunaanni sulianit isertitat 2019-imi piffimmut tassunga naleqqiullugit 7 mio. kr.-nik qaffariarsimapput, tassanilu ilaatigut pissutaavoq sullitanit nutaanit ornigarneqarneq bankimilu eqeersimaarneq.

- Taamaasilluni ukiormanna qaammatini siullerni arfinilinni Kalaallit Nunaanni niuernikkut siuariarneq annerpaajusimavoq, aningaaserivik tusagassiorfinnut nalunaaruteqarnermi allappoq.

Naatsorsuutigisamit sunnerneqannginnerusimaneq

Tamaasa ataatsimut isigalugit aningaaserivik coronap ajornartorsiortitsineranit sunnerneqarpallaarsimanngilaq, aningaaseriviullu 2020-mut naatsorsuutigisani marloriarluni iluarsiiffigisimavai.

- Ataatsimut isigalugu sullitavut ilungersunartorsiorfimmi aniguilluarsimapput, nappaassuullu kingunerinik ilungersunartunik allanik pisoqassagaluarpat ikiuinissatsinnut soorunami piareersimalluta, Árni Ellefsen, BankNordikimi pisortaaneq oqarpoq.

2020-mi ukiup affaani siullermi naatsorsuutit inerneri pingaarnersiukkat:

Akileraarutit sioqqullugit inernerat tassaavoq 74 mio. kr., 2019-imi piffimmi tassani 151 mio. kr.-uvoq

Appartitsinerit sioqqullugit ingerlatsinerup inerneri 93 mio. kr.-upput, 2019-imi piffimmi tassani 67 mio. kr.-usimasut

Taarsigassarsiarititanik appartitsinernik utertitsineq ilanngaatissat ilanngaatigereerlugit -2 mio. kr.-usimapput, 2019-imilu piffimmi tassani 72 mio. kr.-usimallutik

Ingerlatsinerup inerneri 91 mio. kr.-upput, 2019-imilu piffimmi tassani 138 mio. kr.-usimallutik

Bankip taarsigassarsisitai 9,9 mia. kr.-usimapput, 2019-imilu piffimmi tassani 10,1 mia. kr.-usimasut

Bankip uninngatitai 2019-imi piffimmi tassani 14,2 mia. kr.-usimasut appariarsimapput, 2020-milu piffimmi tassani 13,1 mia. kr.-ulersimallutik

Akiliisinnaassusaa 2019-imi piffimmi tassani 19,6%-iusoq, 2020-mi 24%-inut qaffariarsimavoq

Siulersuisut naatsorsuutigaat ilanngaatissat ilanngaatigereerlugit inernerat 80 - 120 mio. kr.-t nalaaniissasoq (Ukiup aallartinnerani 100 – 150 mio. kr.-t nalaaniinnissaat naatsorsuutigineqaraluarpoq)

Pissarsiffik: Banknordik

Nappaassuaq suli nalunartoq

Pisortap ilanngullugu ilisimatitsissutigaa, naatsorsuutigisamit maannamut pitsaanerusumik angusaqartoqaraluartoq, nappaassuup aningaaseriviup aningaasaqarneranut piffissaq ungasinnerusoq eqqarsaatigalugu qanorpiaq kinguneqartitsinissaa suli assut nalunartoq:

- Nappaassuup piffissaq ungasinnerusoq eqqarsaatigalugu qanorpiaq kinguneqartitsinissaa suli assut nalunarpoq, taamaammat annaasaqassagaluarutta banki immikkut 10 mio. koruuninik immikkoortitsisimavoq, maannalu katillugit 35 mio. kr.-t isumalluutissatut inississimalerlugit.

- Sullitat eqeersimaartumik suli sullinneqarluarput, 24%-imillu akiliisinnaassuseqaratta, ilungersunartorsiussagaluarutta isumalluutissaqarluarpugut, Árni Ellefsen oqarpoq.