Kommuni Kujalliup atuartut angerlarsimaffiat tuniniarpaa
Kujataata Kommuniata Qassiarsummi atuartut angerlarsimaffitoqaat piseqqaarsinnaatitaanertalimmik attartortinniarpaa.
Illu 300 kvadratmeteringajammik annertutigisoq savaateqarfiit eqqaaniittut atuartuutaannut atuartut angerlarsimaffiattut atorneqarsimavoq, maannali annertuunik aningaasaliiffigineqartariaqalersimalluni
- Attartortoq illup ilumigut silatimigullu iluarsarneqarnissaanut akisussaassaaq, kiisalu attartortoq innaallagissamut imermullu akisussaassalluni, soorluttaaq attartortoq aserfallatsaaliinermi, innaallagissamut, imermut kiassarnermullu ingerlatsinermi aningaasartuutinut tamanut akisussaassasoq. Attartortup siulliulluni pisinissamut neqeroorfigineqarsinnaatitaanini atussaguniuk piginnittut allanngornerannut tunngatillugu nioqquteqarnermi aningaasartuutaajumaartut tamaasa akilissavai, Kommuni Kujalleq nittartakkamigut allappoq.
Najukkami suliffiutillit piumaneqarnerusut
Qassiarsummi, Igalikumi aamma Narsarsuarmi nunaqarfinni aqutsisut piginnittussamik toqqaanermi peqataatinneqassapput, peqqutigalugu najukkami suliffeqarfiutilimmut aamma takornarialeriusumut Kommune Kujallermi najugalimmut attartortinneqarnissaa pingaartinneqarmat.
- Kommunimik isumaqatigiinniarnermi qaffasinnerpaamik neqerooruteqartoq aallaaviussaaq, kommunillu neqeroorutaasut tamaasa itigartissallugit pisinnaatitaaffigaa, kommunimit ilisimatitsissutigineqarpoq.