Saammaateqatigiinneq – akeqanngitsoq
Saammaateqatigiinnermut ataatsimiititaliap inassuteqaatai Naalakkersuisut allanut isumagitippaat
Sermitsiap sapaatip akunnerani kingullermi Saammaateqatigiinnermut ataatsimiititaliap
isumaliutissiissutaa 2017-imi decembarimeersoq, ullumikkut Hans Egedep eqqaassutissaanik aammalu Kalaallit Nunaata nunasiatut oqaluttuassartaanik oqallinnermik siulittuisoq, ujartorpaa.
Maanna paasinarsivoq isumaliutissiissut taaguutilik »Qanga pisut paasivagut – Ullumi pisut akisussaaffigaagut – Siunissaq pitsaanerusoq sulissutigaarput«, ilinniartitaanermut, kulturimut ilageeqarnermullu Naalakkersuisumi Ane Lone Baggerimiittoq. Aviisi Sermitsiaq sapaatip akunnerani matumani allappoq.
– Saammaateqatigiinnermut ataatsimiititaliap inassuteqaatai pingaaruteqarput, taakkunani
pineqarmat Kalaallit Nunaata nunasiaataasimaneranik saammaateqatigiinnissaq. Inassuteqaatit sammisanik assigiinngitsunik imaqarput, inuit ataasiakkaat inuiaqatigiillu inuuniarnermi pitsaanerusumik atugassaqarnissaannik samminnittut, Ane Lone Bagger Sermitsiamut oqarpoq.
Saamaateqatigiinnermut ataatsimiititaliaq, ukiuni 2014-17-imut atuuttoq, Siumup, Atassutip aamma Partii Inuit 2013-imi marsimi naalakkersuisooqatigiinnissamik isumaqatigiissutaatigut pilersinneqarpoq: » Nunatta nunasiaataasimanera qaangerniarlugu saammassinissaq isumakkeerinninnissarlu pisariaqarpoq, tamannalu pillugu qanoq iliuusissamik pilersaarusiortoqassaaq«.
Isumaliutissiissutut ukiunik 2 ½-inik pisoqaassusilik anguniagaq tamanna anguniarlugu
inassuteqaatinik arfineq-marlunnik imaqarpoq.
– Oqaatigisinnaavara Saammaateqatigiinnermut ataatsimiititaliap inassuteqaatai arlallit
aallartinneqareersimasut, Naalakkersuisunit imaluunniit suliniutilinnit allanit, Ane Lone Bagger oqarpoq.
Tamanna takussavarput.
Oqaluttuarisaaneq kalaallit isaannit isigalugu
Saammaateqatigiinnermut ataatsimiititaliap inassuteqaataani siullerni marlunni Kalaallit Nunaata qanga oqaluttuassartaa pineqarpoq – oqaluttuarisaanermik ilisimatuunit allamiunit
oqaluttuarineqanngitsoq, »uagulli isitsinnik isigalugu«. Ataatsimiititaliap inassutigaa Kalaallit Nunaata universitetiani Ilisimatusarfimmi oqaluttuarisaanermut saammaateqatigiinnermullu ilisimasaqarfimmik pilersitsisoqassasoq.
Ane Lone Baggerip inassuteqaatit naammassereernerarpai:
– Suliniuteqaqatigiit Nunatta Katersugaasivia Allagaateqarfialu-meersut, Ilisimatusarfimmeersut aamma Københavns Universitetimi Saxo-Institut-imeersut »Kalaallit inuunerisa oqaluttuassartaanik ilisimasaqarfik« aallartissimavaat, taannalu ataatsimiititaliap oqaluttuarisaanermut saammaateqatigiinnermullu ilisimasaqarfiliornissamik inassuteqaataanut naapertuutipajaarpoq, Ane Lone Bagger oqarpoq.
Ajornartorsiutaavoq ilisimasaqarfimmik taamaattumik peqanngilluinnarmat,
pilersaarutaaginnarlunili.
Ilanngutassiaq tamaat Sermitsiami atuaruk