Kalaallit Nunaanni uumassusillit pillugit pilersaarut tusarniutigineqarpoq
Nunatsinni uumasut qanoq illersornerusinnaavagut, saniatigullu uumassusillit pisuussutigut atorluarlugit? Nunatsinni uumassusillitassigiinngissitaarnerinut periusissiaq Naalakkersuisunit maanna tusarniutigineqarpoq.
Nunatsinni pisuussutit uumassusillit Naalakkersuisunit illersorneqarusupput, aammali pisuussutit annertunerpaamik atorluarniarneqarput.
Pinngortitap pisuussutai Kalaallit Nunaanni inuunermut, inuussutissanik pilersorneqarnermut nereriaatsimullu attuumassuteqarluinnarput.
Uumassusillit assigiinngitssitaarnerinut periusissiaq 2030-moortoq Naalakkersuisunit suliarineqarsimavoq. Periusissiaq tamanut ammasumik maanna tusarniutigineqarpoq.
- Pinngortitamik illersuinerup aamma pinngortitami isumalluutinik atuinerup akornanni akerleriissinnaasunik Naalakkersuisut takusaqarsinnaanngillat. Isumalluutinik uumassusilinnik atuinerup piujuartitsisumik ingerlanneqarnissaanik, taamaalillunilu pinngortitami isumalluutit sapinngisamik maanna kinguaariinnut tulliuttussanullu iluaqutaanerpaanissaannik qulakkeerinissaq suliassaraarput, periusissiami aallaqqaasiummi avatangiisinut naalakkersuisoq, Jess Svane aallarniuteqarluni allappoq.
Ulorianartut
Periusissiami erseqqissarneqarpoq silap pissusiata allanngoriartornerata Issittumi pisuussutit uumassusillit ulorianartorsiortikkai. Ulorianartorsiortitsisut allat, inuit toqqaannartumik iliuuserisaanneersut tassaapput pisussutinik atuivallaarneq aamma mingutsitsineq, taakkulu aamma eqqumaffigineqarnerusariaqartut periusissiami erseqqissarneqarpoq.
- Taamaattumik pinngortitami sunniutaanerluttussat annikillisarniarlugit aammalu pinngortitami piujuartitsisumik atuinissamut qulakkeeriniarluta immikkoortortat akimorlugit ataatsimoorluta sulinissarput pingaaruteqarpoq. Sunniutit nammineerluta suliatsinnit nunarsuarmiluunniit sumiiffinni allani sulianit pinngorsimagaluarpataluunniit tamanna pisariaqarpoq, periusissiami allassimavoq.
Periusissiami Naalagaaffiit Peqatigiit piujuaannartitsisumik ineriartornissamik anguniagaqarneranik suliaqaqataanissamik imaqarpoq. Naalakkersuisut naapertorlugit piujuaannartitsinisumik ineriartortitsinissamik anguniakkat ilaat uumassusillit assigiinngisitaarnerinut pinngortitallu illersornissaannut toqqaannartumik anguniagaqarput. Soorlu imaani uumasut, nunami uumasut aamma peqqinnissaq atugarissaarnerlu pillugit anguniagassat.
Tamanut ammasumik tusarniaaneq septemberip aallaqqaataanut 2020-mut killeqarpoq. Tusarniummut tunngatillugit paasissutissat uani atuarsinnaavatit.