Pisiniarfiit matoqqasut: Ikiorsiissutit naammanngillat

Martsip 18-iani Nuuk matuneqarpoq. Atuarfiit, ilinniartoqarfiit, pisiniarfiit, nakorsiartarfiit allallu matuneqarput. Nunami maani coronavirusimik tunillatsissimasut marlunngormata, tuniluuttoqarsinnaanera pakkersimaarniarlugu suut tamarmik matuneqarput

Tamanna illoqarfimmi niuernermik ingerlatsisut annertuumik akisunaarpaat.

-Koruunit millionit aappaat avillugit nalingannut upernaami nioqqutissanik pisiaqarsimavugut, taakkulu maanna pujoralannik katersiinnalerput. Ukiut kingulliit marlukk sinneqartoorutitsinnit tamarmik pisiaapput, Morten Nordahl, ilaatigut Nuuk Centerimiittumi pisiniarfimmik Nønnemik piginnittoq oqarpoq.

Pisiniarfiutaa eqqugaanerpaasimasunut ilaavoq. Pisiniarfiimmi tamarmik matoqqatinneqanngillat. Pisiniarfiit Nuuk Centerip avataaniittut aamma pisiniarniarfiit Nuuk Centerimiittut aqquserngup tungaanut isaariallit, eqqiluisaarnissamik pisiniarfimmilu inunnik aalajangersimasumik amerlassusilinnik isersimasoqarnissamik piumasaqaatinik malinnitsillutik ammasinnaatinneqarput.

Ikiorsiissutit naammanngitsut

Morten Nordahl ikiorsiissutit, ajornartorsiornerup nalaani suliffeqarfinnut ikiorsiissutaasussatut aaqqissuunneqarsimasut ilaannik pissarsisimavoq. Aalajangersimasumik aningaasartuutasartut akilernissaannut, aningaasarsiat taartissaannut ingerlatsinermilu annaasanut ikiorsiissutissatut atugassanngorlugit ikiorsiissutaapput. Kingullermulli taaneqartumut atatillugu naapertuutinngilluinnarput, pisiniarfiutilik oqarpoq.

- Martsip qaammataanu 23.000 koruuninik, tassa amerlanerpaamik pissarisiarineqarsinnaasunik, tunineqarsimavunga. Pisiniarfilli matoqqatillugu, ammasuuppat kaaviiaartitassaraluatsinnut naapertuutinngilleruinnarput, Morten Nordahl oqarpoq.

Pisiniarfik alla matoqqatinneqartoq, Nuuk Centerimi ammaaqqammersuugaluarpoq.

- Akiligassat amerliartorput, kaaviiaartitaqannginnitsinnilu ikiorsiissutitut 23.000 koruunit pissarsiarisinnaasavut, ammasuugutta kaaviaartitassaraluatsinnut matussutigineqarsinnaanngillat, piginnittoq Rasmus Therkelsen oqarpoq.

Qaqugorsuarmut kingunerluuteqarsinnaasoq

Tuniluuttoqarsinnaaneranik pakkersimaarinninneq paasisinnaavaa, oqartussalli pingaarnersiuinerat eqqumiigalugu.

- Pisiffimmummi inuppassuit ataatsikkut pisiniakaasarput, Pisiniarfimmut ammatissinnaagaluarparput, isertut qassiuneri nakkutigiutigalugit, taanna oqarpoq.

Pisiniarfiilli taakku marluk suli matoqqasariaqarput, Morten Nordahlillu annilaanngatigaa, kingunerluutaasinnaasut suli ajornerujussuanngorsinnaaneri.

- Nioqqutissat tikisinnikuusavut, juulip aallaqqaataata kingorna tunineqarnissamut naleerutissapput. Tassa nioqqutissat taakku tunisinnaajunnaarsinnaavavut, taanna oqarpoq.

Kaaviiaartitanik annaasaqarnissamut ikiorsiissutit aaqqissuunneqarmata eqqarsaatigineqarsimanngilaq, pisiniarfiit tuniniaanissamut assigiinngitsumik periarfissaqartinneqarnerat. Pisiniarfiit matoqqatinneqartut pillugit immikkut malittarisassaqangilaq, tamannalu naligiimmik unammilleqatigiinnerunngilaq, Morten Nordahl oqarpoq. Taassuma aamma annilaanngatiginerarpaa, ajornartorsiut qaangiuppat inuit pisiniartariaasiat allanngorsimassappat, pisup kingunerluuteqarsinnaanera.

Aaljangersimasumik aningaasartuutaasartut matussutissaannut ikiorsiissutit, pisiniarfiit matoqqatinneqartut eqqarsaatigalugit assigiinngillat. Pisiniarfiit matoqqatinneqartut aalajangersimasumik aningaasartuutissatik tamaasa matussusertissinnaavaat, pisiniarfiilli ammatinneqartut 80 procenti angullugit ikiorserneqarsinnaallutik. Ikiorsiissutit pillugit paasisaqarnerugit, UANI