Ataaseq alla coronavirusimik tunillatsissimavoq

Tunillatsissimasut katillutik maanna aqqanilinngorsimapput. Sisamat peqqisseqqereerput, Nunatsinni Nakorsaaq arfininngormat ilisimatitsisivoq

- Nunami tamarmi misissugassatut tiguneqarsimasut 114-it akissutaat ullumi tiguneqarput. Taakku ilaat ataaseq tunillatsissimavoq, Namminersorlutik Oqartussat arfininngornermi ualikkut naatsumik nalunaaruteqarlutik allapput.

- Tunillatsittoq tunillatsissimasunit ilisimaneqareersuneersuuvoq, taamaammat tamanna tupinnanngilaq. Tamatumali erseqqissaqqiinnarpaa pissutsit suli pimooruttariaqarivut, Nunatsinni Nakorsaaneq Henrik L. Hansen oqapoq, nangillunilu:

- Nunarsuarmi suli tuniluuttoqarpoq, taamaammat najoqqutassat tamatta maleqqissaartariaqarpavut, soorlu inunnut akulerunnaveersaarneq, eqqiarluartarneq napparsimalersimagaannilu angerlarsimaannarneq. Piffissami matumani tuniluuttoqarneranik pitsaaliuiniarnerput pingaaruteqarluinnartuuvoq, Henrik L. Hansen oqarpoq.

Ullumikkut misiligutit taamak amerlatigisut akissuteqarfiginerannut ulluni arlalinni misiligutissat ataatsimut misissorneqarsimanerat pissutaavoq.

Inuit katillugit 625-t misissuiffigineqarsimapput, taakkunanngalu katillugit aqqanillit tunillatsissimallutik. Maanna sisamat napparsimajunnaarsimapput tunillatsissimasunilu peruluttoqarani, Namminersorlutik Oqartussat allapput.

Powered by Labrador CMS