Gå til hovedindhold

Aaqqissuisuuneq innersuussivoq:   Nal. 04.00 itertalerama  

Jacob Nitter Sørensenip sapaatip akunneri kingulliit eqqarsaatigai. Eqqarsaatigaalu timmisartortartunngorniarnermini pisuni ilungersunartuni sungiusarnini iluaqutaasimaqisut.  

Air Greenlandip pisortaanerata isaasa ataatungaani sinaat taartut maluginiarneqarsinnaapput. Tamanna eqqaasanngikkaanni suliffeqarfimmi qullersap pisortatut sulinermini aqutsisutut suliassamik ilungersunarnerpaamik nalaataqarsimanera maluginiaruminaappoq. 

Pissusissamisoortumik meterinik marlunnik immitsinnut ungasissuseqarluta Jacob Nitter Sørensenip allaffiani qullersaqarfiup nerriviani akileriilluta issianitsinni sapaatip akunnerini pisut oqaatsimik ataatsimik oqaatigai:

Ilungersunartorujussuuvoq. 

- Sungiusimagakku piviusuusaartitsilluni sungiusarnermi ilitsersuisumik tunuatunginniittoqartartoq, akuttunngitsumik qaartartuusaartitamik miloriuttakkanik miloriussisartoq, tamatumani pisariaqartinneqarluni ingerlaannartumik qisuariarnissaq ajornartoornerullu iliuuseqarfiginissaa. Coronamilli ajornartoornertut ittumik nalaataqarsimanngisaannarpunga, taannami imaaliallaannarlugu unitsissinnaanngilarput. Aap, suliffeqarfik ajornartoornerup tassanngaannartumik ilagilerpaa. Taama pisoqarnerani atorfillit qullersaattut qanoq iliornissamut ilitsersuuteqanngilaq, pisortaaneq ammasumik oqaluttuarpoq.       

Jacob Nitter Sørensenip qularutiginngilaa suliffeqarfimmi qullersatut, nappaatinut tuniluuttunut isumalioqatigiissitamit aamma Namminersorlutik Oqartussanit nalunaarutigineqartartut peqqussutigineqartullu nikerartillugit suliffeqarfiup ingerlaannarnissaanut suna pingaarnerpaanersoq. 

- Attaveqaqatigiinneq pingaarnersaavoq. Tamanna qularutissaanngilaq, pisortaaneq oqarpoq erseqqissarlugulu pineqartoq tassaammat suliffeqarfiup ingerlataasa nalinginnaasumik ingerlanneqarnissaat aamma suliassaminnik sapinngisartik naapertorlugu naammassisaqarniartarnerat akueralugu.  

- Taama oqartoqarmat qularutissaanngitsumik pingaaruteqarpoq angutip qullerpaamik atorfillip najuussinnaanissaa pisariaqartinneqartunillu aalajangiussisarluni. Sulisuvut qarasaasiami videokkut ullut tamaasa ataatsimeeqatigisarpakka, taamaalillutik aperisinnaaniassammata, aamma aalajangiunneqartut assigiinngitsut sunik tunngaveqarluni aalajangiunneqarsimanersut paasisaqarfigalugit. Tamatuma saniatigut ajornartorsiutitut iliuuseqarfigineqartariaqartoq tassaalluni coronamik ernummateqarnerup iliuuseqarsinnaajunnaarsissanngimmatigut, Jacob Nitter Sørensen erseqqissaavoq.

Ullut suliffiit ilungersunartut 

Siulersuisut aamma aqutsisut ullut tamaasa ataatsimeeqatigineqartarput, aqutsisut ataasiakkaat paasissutissiisarlutik sulisuminnullu oqaloqatigiissutigineqartussat aalajangersartarlugit.

Jacob Nitter Sørensenip nassuerutigaa ullut suliffiit sivisuut timimut sunniuteqartarmata.  

- Qaratsami hormoni adrenalin pissutigalugu eqqarsaqqissaartoqartarpoq eqqummaarillunilu. Nassuerutigisinnaavarali timima sulivallaartarnera mianersoqqussutigimmagu. Aap, qanoq sivisutigisumik ingerlarsortoqarsinnaanera killeqarpoq, oqarpoq.

Navianartorsiulerninnut suut malunniutaasarpat?  

- Naak nalunaaquttap akunnerini 15-ini sulisimagaluarlunga unnukkullu kingusissukkut innarsimagaluaraangamaluunniit nalunaaqutaq 04.00 itertaleraangama. Tamanna uannut pitsaanngilaq, pisortaaneq nassuerpoq.  

- Qujanartumik pitsaalluinnartunik ilaqutaqarama uannik tapersersuilluartunik. Aamma angerlarsimaffimmi meeqqat nuliaralu peqatigalugit qasuersaartarnissaq pingaaruteqarluinnarpoq. Olsenerluni nallukattarneruppat, imaluunniit filmimik isiginnaaqatigiinneruppat, Air Greenland puigorlugu tamakkiisumik qasuersaartarnissaq pingaaruteqarpoq, taamaalilluni nukissamik katersisoqarsinnaammat, oqarpoq.  

Inoqanngitsoq 

Qullersaqarfiup isertarfia pingaarneq ulluinnarmi pineqartumi apersuiartorninni matoqqavoq. Sulisut amerlanersaat angerlartinneqarsimapput, angerlarsimaffimminniillu sulillutik.

-Aap, maanna inoqanngitsumiippugut. Qanittukkut pingasunngornermi misigisarput puigornavianngilara. Namminersorlutik Oqartussat ullaap tungaani aalajangiuppaat timmisartuussineq tamarmi unitsinneqassasoq, unnukkulli nalunaaqutaq 18.00 qaartartumik igeriuttakkamik igeriussipput nalunaarfigalutalu ulluni tulliuttuni marlunni inuit Nuummiit Danmarkimut timmisartuutissagivut. Ullut suliffiit sivisusaqaat, sulisulli massuanatik suliassaminnik aallartitsiinnartarnerat misigalugu nuannerluinnarluni, qullersaq oqarpoq. 

Nuannaarutigilluinnakkani aamma innersuussutigaa, tassa sulisut immikkoortukkuutaani sulisut akissarsiaqqortunerit 50 procentit angullugit qaammatini tulliuttuni akissarsiakinnerulernissaat isumaqatigiissutigineqarmat, suliffeqarfiup akiliisinnaassusia taamaalilluni qulakkeerneqarniassammat.   

- Ammasumik ingerlatsinissaq pingaaruteqarami. Qullersaqarfimmit naalakkiut pineqanngilaq. Suleqatigiinnissamut ataatsimiititaliami ilaasortat tamarmik qanoq inissisimanerput paasilluarsimavaat. Tamanna qamuuna nuannaajallannartuuvoq, tamatumanimi sulisut suliffeqarfiup matuneqannginnissaa qulakkeerniarlugu qanorluunniit iliuuseqarnissaminnut piareersimammata.

Pissusissamisuunngitsorujussuaq 

Qullersaqarfimmi naak nipaakkaluaqisoq qaffasissumik atorfillit ataasiakkaat taamaallaat allaffimminniipput, taamaalilluni pisut allaanerulaartumik ulluinnaallu aallaavigalugit isigineqarsinnaallutik. 

- Suliffeqarfik uningajalluinnarsimammat periarfissatut pilersaarutitut b, c aamma d suliarileruttorpigit?

- Nipaanneq atuutileraangat, soorlumi maanna taama pisoqartoq, soorunami aaqqissuussassaqartarpoq. Sinerissami suli timmisartortartoqarpugut piareersimasussanik. Namminersorlutik Oqartussat sullillugit Københavnimut ullut tamaasa timmisartuussisarpugut peqqissutsimullu sulisunik angallassisarluta,  

Jacob Nitter Sørensen nassuiaavoq nangillunilu: 

- Tamatumani pissusissamisuunngitsoqarnera pineqarpoq, oqarpoq.

- Æh, sunaana pigit?  

- Ulluinnarni sulinitsinni putsumik, anorersuarmilluunniit ilungersunartorsioraangatta, taamaatitsiinnarnernik imaluunniit kinguaattoornernik nalaattakkatsinnut atatillugu oqariartaaseq qaffasissutsinut assigiinngitsunut arlalinnut immikkoortitertaratsigu.

Pissusissamisuunngitsoq angisooq, akunnattoq aamma mikisoq, nassuiaavoq.   

Pissusissamisuunngitsorliuna sunaana?

- Aap, assigiinngisitaartuuneq pineqarpoq. Sullissat amerlanerusut eqqorneqartillugit, ilaasunik sullissineq, qitiusumik iliuuseqarfiusartumi, qitiusumik ingerlatsivimmi ulapputtoqarneruleraangat pissusissamisuunnginneq annerulersarpoq, suliffeqarfiup avataaniittunut taama nassuiaavoq.  

- Ullutsinni pisunit sakkortunerusumik eqqugaasimanngisaannartugut oqartoqarsinnaavoq. Aap, tamanna pissusissamisuunngitsorujussuuvoq, pisortaq qungujulluni oqarpoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER