Tunumi nannunik nalunaaqutsiinissaq taamaatiinnarneqartoq
Pinngortitaleriffiup apriilip qaammataani suliassaq coronamik nappaalasoqalernerata kingunerisaanik taamaatiinnarpaa
Nunatta Kangiata avannaani nannunik nalunaaqutsersuinissamik pilersaarutit nualluussuarmik coronamik nappaalasoqalernerata kingunerisaanik taamaatiinnarneqarput, Pinngortitaleriffik ilisimatitsivoq.
- Apriilimi ingerlatassaraluit kisimik eqqugaangallarput. Nunatta kangiata avannaani nannunik nalunaaqutsiinissaraluit taamaalillutik taamaatinneqarput, miluumasunut immikkoortortaqarfimmi pisortaq Fernando Ugarte oqarpoq.
Nannunik nalunaaqutsiinerit biologinit, ataqatigiissaarisartumik piniartunillu inuttaqartarput, USA-mit, Nuummit, Ittoqqortoormiuneersunillu inuttaqartarlutik, peqataasussalli nunaminniit aallarsinnaanngikkunik Island aqqusaarlugu Nerlerit inaannut timmisartorsinnaannginnamik ornitassaminnut anngussinnaanngillat, Pinngortitaleriffik ilisimatitsivoq.
- Taamaattumik nannunik nalunaaqutsiinissat ukiup tullianut kinguartinneqarput, Fernando Ugarte naggasiilluni oqarpoq.