Piaartumik inatsisiliaq: Pinngitsaaliilluni nakorsaanissaq inerteqqutillu amerlanerusut

Coronavirusip siaruatsaaliornissaanut akiornissaanullu Nappaatit Tunillaassuuttut pillugit Ataatsimiititaliarsuaq amerlanerusunik periarfissaqalernissaa anguniarlugu, Inatsisartut inatsimmik piaartumik suliaqassapput. Nuummi coronavirusimik tunillatsissimallutik napparsimasut amerliartorlutik maanna quliupput.

Inatsisartut immikkut ittumik ataatsimiinnissaanni immikkoortut oqaluuserisassanut ilanngunneqartussatut kissaatigineqartut Siulittaasoqarfimmit ullumi oqaluuserineqarput akuerineqarlutillu, ataatsimiinnissarlu ullulerneqarluni. Inatsisartuni ilaasortat 16-iusut aalajangiisinnaassuseqartut pingasunngornermi aprilip aallaqqaataani immikkut ittumik ataatsimiissapput.

Immikkoortut pingaarnerit 18-it

Nappaatit tunillaassortut akiorniarlugit iliuutsit pillugit Inatsisartut peqqussutaata allanngortinneqarnissaanut arlalinnik siunnersuuteqartoqarpoq.

Inatsisip allanngortinneqarnerani Nappaatit Tunillaassortut pillugit Ataatsimiititaliarsuaq Naalakkersuisullu coronavirusip akiornissaanut amerlanernik iliuuseqarsinnaalissapput.

• Nappaatit Tunillaassortut pillugit Ataatsimiititaliarsuup aaqqissuussat, pisussat allallu inerteqqutigilersinnaalissavai.
• Inuit ulorianartumik tunillaassortumik napparsimanasorineqartut, piumanngikkaluarpataluunniit unitsinneqarsinnaalissapput pinngitsaalillugillu nakorsarneqarsinnaalissallutik.
• Naalakkersuisut pisariaqavissumik paarsisarneq, misilitsinnerit, soraarummeernerit allallu pillugit malittarisassanik erseqqinnerusumik aalajangersaasinnaalissapput.
• Naalakkersuisut assartuutinut ilaannginnissaq pillugu aamma ininut inuussutissarsiutigalugu ingerlataqartut pigisaannut isernissamut inerteqquteqartitsinissaq pillugu aalajangersaasinnaapput.

Inatsimmut nassuiaatit nalinginnaasut uani atuakkit.

Allannguutissatut siunnersuutit coronavirusip siaruatsaaliornissaanut iliuusissatut pisariaqartinneqartut, peqqissutsimut Naalakkersuisoq, Martha Abelsen nassuiaateqarpoq.

- Siunnersuusiornerup siunertaa tassaavoq, oqartussaasut, tamatumunnga ilanngullugit politiit inerteqqutigineqartunut pisariaqalerfinni maleruaasitsiniarnissaminnut pisussaaffilerneqarsinnaanissaannut malittarisassanik pisariaqartinneqartussanik aalajangersaanissamut periarfissaqartitsinissaq. Siunnersuut akuersissutigineqassappat, virusip siaruaannissaanik pakkersimaartitsiniaanissamut oqartussat pisariaqartitaminnik sakkussaqartinneqarnissaannut nalunaarutit Danmarkimi akuersissutigineqarsimasut assigalugit nalunaarutinik arlalinnik akuersissuteqartoqarumaarpoq, siullermeerneqarnerani saqqummiussinissamut oqaaseqaammi Martha Abelsenimit taaneqarpoq.

Inatsisartunut maleruagassat sukannersut

Tunillaassortoqarnissaa aarleqqutigineqarmat pingasunngornermi ataatsimiittoqalerpat Inatsisartut sukannersunik maleruagassaqarput.

Inatsisartunut ilaasortat katillugit 13-it Nuummi najugaqarput. Inatsisartulli aalajangiisinnaassuseqassappata ilaasortat ikinnerpaamik 16-it ataatsimiittarfimmiittariaqarput.

- Partiit tamarmik sapinngisamik pitsaanerpaamik sinniisuutitaqarnissaatSiulittaasoqarfimmit aalajangiunneqarpoq, taamaattumillu taasisarneq pillugu isumaqatigiissuteqarneq, najuutinngikkallarnissat aammalu piffissami sivikitsumi sulinngiffeqarallarnerit akuleriisillugit atorneqarnissaat
pisariaqassaaq, taamaaliornikkut qulakkeerneqarsinnaaqqullugu ilaasortat taasisinnaasut Inatsisartut ataatsimiittarfianni 16-iunissaat, siulittaasoqarfimmit nalunaarutigineqarpoq.

Tunillaassortoqarsinnaaneranilli aarlerinartoqarnera pissutigalugu ataatsimiinnerup nalaani inuit amerlanerpaamik quliusassapput. Ataatsimiinnerup nalaani imminnut qanillisoqassanngilaq. Taasinerit marlunngorlugit avinneqassapput, ilaasortat tamarmik ataatsikkut inersuarmiinnginniassammata. Avataaneersut, tusagassiortut atorfilittallu ataatsimiittarfimmut isersinnaanerat periarfissaassanngilaq. Internet tv-lu aqqutigalugit ataatsimiittarfimmi ataatsimiinnermik malinnaanissaq innersuussutigineqarpoq.

- Inatsisartut peqqussutaat kingusinnerpaamik ulloq 31. decembari 2021-mi nutarterneqassasoq siunnersuut aalajangersakkamik ilaqarpoq, neriuppungalu ilungersunartorsiornerput taamanikkussamut qaangerluareersimassagipput, taamatullu inatsisip nutarternissaanut misilittagaqarlualereersimassasugut, Martha Abelsen naggasiivoq.