Ikiorsiissutit: Ingerlatseqatigiiffiit 104-t katillugit 20 mio. koruunik qinnuteqarsimasut

Suliffeqarfiit 104-t aningaasatigut ajornartoornermi ikiorserneqarnissamik qinnuteqarsimapput - 200-nillu amerlanerusut qinnuteqaataat takkuttussaallutik, Greenland Business ilisimatitsivoq

Naalakkersuisut ikiorsiissutissat arlalli, Kalaallit Nunaanni suliffeqarfiit ajornartorsiorneranni ikiorsiisussat arfininngormat saqqummiuppaat.

Greenland Businessimi ikiorsiissutissat ilaat aqunneqassapput, ataasinngormallu ullup qeqqanut qinnuteqarsinnaaneq ammaanneqarpoq. Taamanili pisut sukkasimaqaat, Greenland Businessimi ingerlatsinermi pisortaq Christian Wennecke oqaluttuarpoq:

- Suliffeqarfiit 104-t maannamut qinnuteqareerput, 208-llu qinnuteqaatiminnik immersuillutik, Christian Wennecke sisamanngormat ullup qeqqanut Sermitsiaq.AG-mut oqaluttuarpoq.

438.000 koruunit tunniunneqariaannanngortut

Suliffeqarfiit Greenland Business aqqutigalugu uku qinnutigisinnaavaat

- Taamaatitsiinnarnerit kinguneranut kaaviiaartitanik annaasaqarnermut 23.000 kr. tungaanut qinnuteqartoqarsinnaavoq.

- Aningaasartuutit aalajangersimasut 25-80%-ii qinnutigineqarsinnaapput (aningaasarsiaanngitsut, taarsigassarsianullu akilersuutaanngitsut, taakkulu assingisaat).

- Taarsigassarsiassanik ukiuni pingasuni erniaqaratillu taarsersorneqartussaanngitsunik qinnuteqartoqarsinnaavoq.

Pissarsiffik: Greenland Business

Ikiorsiissuteqarnissamut aaqqissuussat nutaat sapaatip akunnerani kingullermi aatsaat politikkikkut akuerineqaraluartut, Greenland Businessip suliffeqarfiit qinnuteqaataannik tigooqqaanissamut atortorissaarutimik atuutut ilaat atorsinnaasimavai.

Qinnuteqaatit siulliit qulit sisamanngormat naammassillugit suliarneqarput, Greenland Businessimillu 438.000 koruunit qinnuteqartunut qulinut taakkununnga tapiissutigineqarnissaat akuersissutigisimavaa.

- Qinnuteqaatigineqartut tamarmik 40.000 koruunit missaanniipput, agguaqatigiissinnerannut qanittunnguullutik. Oqaatigineqassaarlu, suliffeqarfissuit angisuut suli sullillugit aallartinnginnatta, Christian Wennecke oqarpoq.

Suliassarpassuit utaqqisut

Pisortap tullia naapertorlugu, qinnuteqaatit tallimat sinnilaarlugit amerlassusillit suliassaapput, taakkunani suliffeqarfiit 200.000 koruunit sinnerlugit tapiiffigineqarnissamik qinnuteqarsimapput. Taakku suliarinerat sivisunerulaassaaq, taakkulu saniatigut annikinnerusunik qinnuteqartut allat suliassaallutik:

- Suliassarpassuupput, sapinngisatsinnillu sukkanerpaamik suliariniarsarivavut. Maanna Kommuneqarfik Sermersuumit Namminersorlutillu Oqartussanit suleqatissarsisimavugut, taakkulu ikiuutaassaqaat, ingerlatsinermi pisortaq oqarpoq.

Greenland Businessimit qinnuteqaatit katillugit 20 millioner koruunit missaannik annertussusillit tiguneqarsimapput, Greenland Businessimilu ullut ulapiffiusimaqalutik:

- Soorunami pisoq nuanninngilaq, aamma suliffeqarfinnik piginnittut matusinissaminnik eqqarsaasersortut oqaloqatigalugit sakkortuvoq. Suliffeqarfiilli ilaasa ajornartorsiummik aniguinissaannut, pisullu qaangiunnerani suli atuutiinnarnissaannut ikiuilluni nuannersumik misiginarpoq , Christian Wennecke oqarpoq.

Powered by Labrador CMS