Pilersaarut: Kommune Kujalleq Issittumi kulturikkut illorsuarmik pilersitserusuttoq

Qaqortup avannaata tungaani kulturikkut illorsuarmik pilersitsinissamik qinnuteqaammik allagarsivoq.

Issittumi Kulturikkut illorsuarmik pilersitsinissap siunertaraa assit, qalipakkat, allatat atortullu aqqutigalugit issittumi inuiaat assigiinngitsut inooriaasaat takutissallugu, kommunalbestyrelsip ataatsimiinnissaanut oqallisissiani takuneqarsinnaavoq..

Periarfissat

- Illorsuup siunertaraa najukkami innuttaasunut, ilaqutariinnut, tikeraanut, takuniaasunut Kujataanilu takornarianut nuannaariartarfik soqutiginartoq pilersissallugu. Illorsuup saqqummersitsiviunerata saniatigut Issittumi Uumasuusivittut taallugu tuttut uumasuutigineqassapput, tikeraallu misigisaqarfigalugit ilagalugit assilissisinnaassallutik, tamatumalu saniatigut innuttaasunut tikeraanullu naluttarfeqassaaq kissartumillu kinisimaartarfeqassalluni, sulisunut tikeraanullu akunnittarfeqassalluni, sutorniartarfeqassalluni tikeraanullu neriniartarfeqassalluni, atuarneqarsinnaavoq.

Nunap ilaa ullumikkut sanaartorfigineqarsimanngilaq, aaqqissuussinermillu pilersaarusiornermi Qaqortup avannaa-tungaani mittarfiup tungaanut aqqut najoqqutarlugu illoqarfiup ineriartortinneqarnerani "nunap ilaatut ataatsimoorussanut siunertanut atorneqarnissaanut toqqarnersimalluni".

Kommunalbestyrelsi ataatsimiissaaq

- Ingerlatsivik naliliivoq pilersaarut illoqarfiup avannamut ineriartortinnissaanut iluaqutaassasoq. Mittarfiup sananeqarnissaa angalasullu aamma takornariat amerliartornerat ilutigalugu angalasunut, tikeraanut takornarianullu Issittumi Kulturikkut Illorsuaq illoqarfiup kommunillu kiinaasa ilaatullusooq tikilluaqqusisutullu inissisimalissaaq. Taamaalisukkut illorsuaq najugaqartuusunut nuannaariartarfittut tulluassaaq, takornarianullu nuukkumaartussanullu pilerinarsaaqataasussaalluni, ataatsimiissutigineqartussami atuarneqarsinnaavoq.

Kommune Kujallermi kommunalbestyrelsi ullumi pingasunngornermi ataatsimiissaaq.