Norsaq sapaatip akunnerini tallimani hangarimiittussanngortoq

Air Greenlandip timmisartuutaa Airbus Kangerlussuup Københavnillu akornanni angalasartoq ukiut tamaasa teknikkikkut misissorneqartarpoq, tassa timmisartup atortuisa amerlanerpaartaat misissorneqartarlutik, tamannalu nalunaaquttap akunnerini 6.000-ini suliarineqartarluni.

Timmisartoq utaqqiisaa atugassaq ilisimaneqareerpoq, tassa Air Greenlandp Airbus A330-200 Portugalimi timmisartuutileqatigiiffimmit ACMI- og charterflyselskab Hifly-mit attartorneqarsimavoq.

Timmisartup attartukkap siullermik angallassinera

- Hifly-mit timmsartoq A330 Københavnimiit Kangerlussuarmut februaarp 17-iani GL779 aqqutigalugu angallasseqqaarpoq, pilersaarutaavorlu timmisartoq attartugaq martsip 22-ata tungaanut Air Greenlandimit ingerlanneqarnissaa, timmisartorneq pillugu atuagassiaq check-in.dk allappoq.

Timmisartoq attartugaq ukiunik 22-nik pisoqaassuseqarpoq inunnullu 298-inut issivissaqarluni, tassa Norsamit 20-nik amerlanerusunik. Canada 3000 Airlinesimullu tunniunneqaramili assigiinngitsorpassuarnik sullissisimalluni. Tassa Italiami Volare Airlines, Spaniami Air Madrid, Saudi Arabian Airlines aamma XL Airways France sullittarsimavai, check-in.dk ilisimatitsivoq.