Inatsisinik unioqqutitsisoqaraluartoq KNR-ip siulersuisuisa aaqqissuisoqarfik tatigaa
KNR-imi tusagassiortut akiliunneqarlutik USA-mut angalasimanerat pillugu KNR-imi siulersuisut ullumi tallimanngornermi ataatsimiipput
- Siulersuisut KNR-ip akeqanngitsumik angalasimaneq ineqartinneqarnerlu akuerisimammassuk ilungersunartutut isigaat. Siulersuisut pisortaqarfimmut aaqqissuisoqarfimmullu erseqqissarpaat akiliutitilluni angalanerit ineqartinneqarnerillu tapiissutaammata.
KNR-imi siulersuisuisuni siulittaasoq Sofie Sandgreen, tusagassiutinut nalunaarummi oqarpoq. KNR-ip tusagassiortuisa marluk USA-mut akiliunneqarlutik angalasimanerat inatsisinik unioqqutitsinerusoq Namminersorlutik Oqartussat aalajangeereersoq taama oqaaseqarpoq. Tamanna pillugu KNR-imi siulersuisut immikkut ittumik ullumi tallimanngornermi ataatsimiipput.
Aaqqissuisoqarfik tatigineqarpoq
Ataatsimiinnermi siulersuisut ilisimatinneqarput aaliangernermut akuersinermullu tunuliaqutaasut USA-mut angalanissamut Siulersuisunut ilisimatitsissutigineqartoq KNR-ip pisortaanit nutaarsiassanullu pisortamit saqqummiunneqartoq Sofie Sandgreen ilisimatitsivoq.
- Siulersuisut isornartorsiuteqarlutik oqaaseqaateqarnermi saniatigut peqatigitillugu sukkasuumik suliamik aallartitsivoq tapiissutinut malittarisassat suli annertunerusumik qulaajartillugit taamatut pisoqaqqinnginnissaa qulakkeerniarlugu.
- Siulersuisut erseqqissassavaat KNR-ip qullersaqarfia nutaarsiassaqartitsivia aaqqissuisoqarfiillu tatigilluinnaratsigit, taakkulu tatiginassusaat innarlerneqarsimanngitsutut isigigatsigit, Sofie Sandgreen oqarpoq.
USA-mi angalanermut tunngatillugu nutaarsiassiissutigineqartut KNR-ip tamarmik peerpai.