Illuatungiliuttut soraarnerussutisiassat pillugit isumasioqatigiinnissamut Vittus qaaqqugaat

Soraarnerussutisiaqalernissamut aaqqissuussinermut peqataasussaatitaanermut tunngatillugu akileraarutinut tunngasortai innuttaasunut paasissutissiissutigineqartariaqarput.

- Soraarnerussutisiaqalernissamut aaqqissuussinermut peqataasussaatitaanermut tunngatillugu akileraarutinut tunngasortai paasiuminaalligaluttuinnarmata, illuatungiliuttut ataatsimoorlutik Naalakkersuisut ammasumik isumasioqatigiinnissamut qaaqquaat, partiini siulittaasut Mûte Bourup Egede (IA), Hans Enoksen (PN), Aqqalu Jerimiassen (A) aamma Tillie Martinussen (Sam) ataatsimut nalunaaruteqarlutik atsiorsimasaanni taamatut allassimasoqarpoq.

- Taamaalilluta qulakkeerniarparput, Naalakkersuisut aningaasanik innuttaasut kaasarfiannit aalleqattaarfianni innuttaasut equngasumik eqqorneqannginnissaat.

Ullualunnguit matuma siornatigit Namminersorlutik Oqartussat nalunaarutigaat, innuttaat 6.628-t soraarnerussutisiaqarnissaminnut akiliuteqarnerussasut. Aningaasat akileraarutitigut aaniarneqarput. KNR allappoq.

- Ilanngullugu paaserusupparput, suliaq taanna akisussaasunit qanoq sivisutigisumik ilisimaneqarsimanersoq.

- Inatsimmik malinnittoqarsimanersoq aamma paaserusupparput, innuttaasorpassuimmi uagutsinnut saaffiginninnermikkut inuillu attaveqaqatigiittarfiisigut saqqummiuttarsimavaat, inummut ilanngaatit allanngortinneqarsimasut aamma akileraarutissaat qaffanneqarsimasut, taakku Akileraartarnermut Aqutsisoqarfiup akissutigisarsimasai innersuussutigaat. Peqatigitillugu saaffiginnittut ilarpassuisa oqaatigisarpaat, siuliani pineqartut pitinnagit akileraartarnermut aqutsisoqarfik oqaloqatigineqarsimanngitsoq, naak tamanna piumasaqaataagaluartoq, partiit siulittaasui taakku sisamat allapput.

- Inummut ilanngaatip peerneqarsimanerata akileraarutissallu qaffanneqarsimanerisa saniatigut Akileraartarnermut Aqutsisoqarfimmiit paasissutissiissutigineqarsimavoq, akileraarutip qaffaataa ukioq naallugu atuutissasoq, tassa akiitsorineqartut akilerneqarnissaata tungaannaanuunngitsoq.

- Tusagssiorfiit peqatigitillugu oqaluttuaraa, inuit 6.000-it sinnerlugit amerlassusillit tamatumannga eqqugaasimasut.

- Tamatumunnga tunngatillugu inatsit erseqqissupilussuuvoq, Soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaanni nr. 21, 28. november 2016-imeersumi § 7, imm. 2 naapertorlugu piumasaqaataavoq, akileraaruseriffiup naatsorsuereernermini inuk pineqartoq attavigissagaa periarfissillugulu sapaatit akunneri sisamat qaangiutsinnagit akiliuteqarnissaanut.

- Taamaammat naatsorsuutip ukioq naallugu atuutsinneqarnissaa, inummut pineqartumut attaveqarsimannginneq kiisalu januaarimi sapaatit akunnerisa siulliit marluk ingerlaneranni sapaatip akunnerinik sisamanik piffissaliisarnerup malinneqarsinnaanera eqqortuusinnaanngilaq.

Illutungiliuttunit neriuutigineqarpoq, partiit allat ammasumik isumasioqatigiinnissamik kissaateqarneq tapersersussagaat.