Kajumissusilik Ann: Qujanartumik sunik tamanik ilisimasaqanngilanga
Uummannami Meeqqat angerlarsimaffianni pisortaq Ann Andreasen ullumi 60-iliivoq
Ann Andreasen oqaloqatigalugu 60-inik ukioqalersimasorinanngilaq. Qiimasuuvoq, uummaarissuuvoq tunniussimasuulluni, taamaannerata allaat inuit inuusunnerujussuit inorsartissinnaavai.
Inuuissiortullumi nammineerluni tamanna upperiuminaatsillugu oqaatigaa.
- 60-inik ukioqartutut misigisimanngilanga. Misigisimavunga 20-nik ukioqartutut ukiunik 40-nik immikkut misilittagalik, Ann oqarpoq, ileqqumisullu illarujussuarluni.
Ukiut 35-t
Ann Andreasen inuunermi affaa Uummannani Meeqqat angerlarsimaffianni tunniussimalluni sulisimavoq. Meeqqat angerlarsimaffianni ukiut 35-t sinnerlugit sulisimavoq, taakkunannga ukiut 30-t pisortatut atuussimalluni. Meerarpassuit atugarliortut naapittarsimavai, ima nanertinnartigisinnaasut allaat inuit allat ukiualunnguit sulingaluarlutik uniinnartariaqartarlutik.
- Oqimaatsunik suliaqartaraluarluta, suliavut iluatsikkaangatsigit inuusuttut takullugit nuannertaqaaq. Inuusuttut tunniussaqartaqaat, tamannalumi misigalugu nuannerluinnarpoq, Ann oqarpoq.
- Inuusuttut taakku oqimaatsorsioraluaqalutik tunniussaqarsinnaassussaat tupinnaqaaq. Suliavut oqimaatsorsuartut taaneqarsinnaangaluartut aniguiffissaqartuaannarpoq. Aniguiffissaqartinnagu oqimaatsorsiortoqarsinnaanngilaq.
Allanik nersualaarinnittoq
Nammineq nukissaqarnermi saniatigut meeqqallu atugarlioraluarlutik ineriartortut takullugit nuannaaruteqartaraluarluni, Ann Andreasenip sulilluni ingelaannarneranut pissutaasoq alla tassaavoq, suleqatinit, najukkami innuttaasunit Kalaallillu Nunaanni eqqumiitsuliortunit tapersersorneqarneq.
- Inuppassuaqarmat suliatsinnut tapersuisuisunik qujasaqaanga. Uummannamiinnera nuannareqaara, suliavummi taama inukitsigisumi tapersersuisoqanngippat isumagisinnaanngikkaluarpavut. Susassaqarfiimmi akimorlugit suleqatigiinneq pingaaruteqarluinnarpoq.
- Qujanartumik sunik tamanik ilisimasaqanngilanga, taammaammat ataatsimoorluta kivitsinissatsinnut inuppassuit pisariaqartippakka.
Nersornaat
Ann Andreasen siorna februaarip qaammataani DR-imi P2-mit Ukiup Ilungersuussilluartuatut toqqagaalluni nersornaaserneqarpoq. Pisarnermisut nersorneqarnini allanut ingerlateqqippaa.
- Nersornaat uannuinnaanngilaq, suleqatinnut meeqqallu angerlarsimaffianni sulinermi tapersersuisunut allanut aamma nersornaataavoq. Siullertulli inuusuttunut nersornaataalluni. qanoq atugaqarsimanerat eqqarsaatigissagaanni, qanoq pisinnaasaqartiginersut takullugu nuannersupilussuuvoq.
Nersornaasiisoqarmat meeqqat angerlarsimaffianneersut meeqqat soorunami peqataapput, soorunami aamma nersornaasiisoqarnerani takutitsipput.
- Nersornaasiisoqarmat inuusuttut namminneerlutik qaqeriarlutik takutitsineranni immiussat takoqqeqqammerpakka. Takoqqikkaangakku nuannaalertarpunga. Inuusuttut taakku pisinnaasaqarluarnerat Kalaallit Nunaata tulluussimaarutigisariaqarpaa.
20-nik ukiullip Annip Meeqqat Angerlarsimaffianni pisortatut misilittakkanik ukiut qassit suli katersiniarnini oqaatigisinnaanngilaa.
- Ullormiit ullormut ingerlavunga, peqqissusermi qanoq sivisutigisumik atuussinnaanersoq ilisimaneqanngilaq, inuuissiortoq utoqqasaanngulersimanerminik ilisimaarinnittoq oqarpoq.
Ann Andreasen pillugu, pingaartumillu allat Ann pillugu qanoq oqaaseqarnersut Sermitsiaq.AG-mi, uani pisiarisinnaasanni paasisaqarnerusinnaavutit: