Kruse uppernarsaasoq: Kim siulittaasutut sassaqqinniarpoq

Karl Kristian Krusep KNR-imut uppernarsarpaa, Kim Kielsen Siumumi siulittaasutut sassaqqinniartoq

Ataasinngormat Sermitsiaq.AG-p tusarfiit tutsuiginartut innersuussutigalugit oqaluttuaraa, Kim Kielsen Siumumi siulittaasutut sassaqqinniarluni aalajangiinnarsimasoq. Maannalu partiimi siulittaasup tulliata Karl Kristian Krusep KNR-imi aallakaatitassiaq "Inuiaat Tillernerat" aqqutigalugu tamanna uppernarsarpaa.

Siorna ukiassakkut Kim Kielsen saassunneqaqattaarami aalajangeraluarpoq ukioq manna aasakkut nuna tamakkerlugu ataatsimeersuartoqalerpat tunuarniarluni.

Tamatuma kingorna nalunaarutigisartagai ersernerlulersimapput, maannali paasinarsivoq isumaa allanngorsimasoq. Sermitsiaq.AG-llu paasissutissaatai naapertorlugit, maanna sassaqqinniarnerminut pingaarnertut tunngavilersuutigisimasaa tassaavoq, Erik Jensen siulittaasussatut naleqqutinngitsoorugamiuk sassaqqinniartoq.

Karl Kristian Kruse aamma nammineerluni siulittasussatut sassarnissaminik eqqarsaateqarpoq. Ullualuit qaangiuppata aalajangerumaarluni Sermitsiaq.AG-mut oqaatigaa.

Powered by Labrador CMS