Eqqartuussisut tungujortumik taartumik uliguaqartassasut

Arlaannaannulluunniit attuumassuteqannginneq ilumoorsaartuunissarlu takutinniarlugu Kalaallit Nunaanni eqqartuussisisut ukiortaamiit pinerluttulerinermi suliani aamma saqitsaannermik sulianik suliaqarnermi eqqartuussummik nalunaarutiginniffiusussani tungujortumik taartumik uliguaqartalissapput

Danmarkimi eqqartuussivinni eqqartuussisut uliguat immikkut ilusilersorlugit sanaat 2012-imi atulerpaat. Kalaallit Nunaata tamatuma kingorna danskit misilittagariligaat ilinniarfigisimavaat, maannalu isumaqatigiillutik siunissami arlaannaannulluunniit attuumassuteqannginneq, ilumoorsaartuunissaq assigiimmillu pinnittarnissaq takutinniarlugu uliguaqartalernissaq aalajangersimavaat.

Assigiinngissutaa

Kalaallit uliguaasa danskit uliguaannit assigiinngissutituaraa, nuilaasigut aamma atsipaavisigut sinaakkutaat qorsummik taartumik qalipaateqarnerat. Taamatut qalipaateqarnissaat aalajangiunneqarsimavoq nunani taakkunani marlunni eqqarsuussiviit assigiinngitsuunerat malunnartinniarlugu. Uliguat ilupaqutitai paragraffimik naqinnertaqarput.

Eqqartuussisut siulittaasuat, eqqartuussisut kisimik siunissami uliguaqartartussaapput. Eqqartuusseqataasartut, unnerluussisut illersuisullu atisatik nalinginnaasut suli atortassavaat, Kalaallit Nunaanni Eqqartuussivik ilisimatitsivoq.

Uliguaqarfiusassanngitsut

- Pigisanik kingornussassanilluunniit suliani, akiliisitsiniarnermi suliani aamma eqqartuussinerugallartuni eqqartuussisut sulianillu sullissisut uliguaqartassanngillat. Uligussat eqqartuussinerni immikkut ilungersunaatilinnut atugassatut naatsorsuussaapput – pingaarnertut isumaqatigiinniarnernut – innuttaasup suliamik imminut tunngasumi aalajangiiffigineqarnissamik naatsorsuuteqarfigisinnaasaani. Pinerluttulerinermi suliaasinnaallunilu innuttaasup pineqaatissinneqarluni eqqartuunneqarfia, aamma saqitsaannermik suliami aningaasanik akileeqqusinermik piumasaqaateqarfiusuni imaluunniit ilaqutariissutsikkut suliani eqqartuussisulersorfigisani angajoqqaatut oqartussaassuseqarneq pillugu aamma najorteqartarneq pillugu isumaqatigiinngissuteqarfiusuni suliani eqqartuussisup aalajangiiffigisaani, tusagassiorfinnut nalunaaruteqarnermi ilisimatitsissutigineqarpoq.

Powered by Labrador CMS