Nordic Cup: Frederik Funch arsarluarnerpaatut toqqarneqarpoq
Nordic Futsal Cupimi kalaallit unammisartuisa akornanni Frederik Funch arsaalluarnerpaatut toqqarneqarpoq
Finlandimi Nordic Futsal Cup-imi unammersuaarnermi kalaallit arsaattuisa akornanni Frederik Funch unammersuaarnermi takutitsilluarnerpaatut toqqarneqarpoq.
Ajoqquseqqanini pissutigalugu kalaallit unamminerini sisamani pingasoriarluni arsaateqataavoq, tassa unammineq ataaseq ilaaffiginngitsoorlugu.
Nipaallisaatitortariaqarsimasoq
- Aasarli ajoqquseqqalerpunga, unammersuaarnermut ilumut peqataanissara nalunarsimalluni. Nipaallisaatinik iisartakkanik iiseqqaarlunga unammeqataasarpunga, taamaattumik taamatut toqqagaalluni nuannerpoq, Frederik Funch Sermitsiaq.AG-mut oqarpoq. Putukkumi eqqaatigut aasaq ajoqquserpoq, ukiumi nutaami suliaritittariaqalissalluni.
Danskit nunanut allanut unammisartui sinnerlugit Nordic Cup-imi unammeqataarusunnginnersoq aperitissimagaluarluni oqarpoq.
- Ajoqquseqqanerali pissutaalluni danskit nunanut allanut unammisartuinut peqataaniarnanga nalunaarpunga. Taakku EM-imut anngunniuttussaapput januaarimi. Toqqagaassaguma ajoqquseqqassanngikkumalu imaassinnaasoq ilaasunga, Frederik Funch oqarpoq.
Ataaseraarpoq
Frederik Funch futsalimi unammersuaarnermi ataaseriarluni isertitsivoq - Danmarkimut unamminermi isertitsilluni.
- Unamminigut marluk siulliit arsarnerluppugut, ataqatigiinngitsumik unammilluta. Unamminerit kingulliit marluk takutitsilluarneruvugut. Norgemut unammigatta unammilluaraluaqaagut, naak 0-3-mik ajorsaraluarluta. Isertitassat isertittarsimasuugutsigit ajugaasimasinnaagaluarpugut. Danmarkimut ajugaanerput nuanneqaaq, qujanartumik tassani unammilluaqaagut, oqarpoq.
Frederik Funch MR-scannertippoq Danmarkimi. Februaarimi suliaritissanerluni suliaritissannginnerluniluunniit tassani paasisissavaa. Suliaritissaguni qaammatini pingasuni imaluunniit sisamani arsaqqusaanavianngilaq.