Kommune Kujalleq: Nalunaarusiaq borgmesterimit pimoorullugu tiguneqarpoq

Kommune Kujalleq inuit innarluutillit atugaasa pitsanngortinnissaannut katillugit qulinik innersuussuteqarfigineqarpoq.

Borgmester Kiista P. Isaksen (S) erseqqissaavoq nalunaarusiaq pimoorullugu tigullugu, namminerlu qulakkiissallugu kommunimi kommunalbestyrelsemi ilaasortat ingerlatsiviillu tamarmik nalunaarusiaq tigussagaat.

- Kisianni erseqqissarusuppara nalunaarusiaq aatsaat ippassaq tiguarput (marlunngornermi, aaqq.). Nalunaarusiaq kommunimit pimoorullugu atuarneqassooq suliarineqassallunilu, inuit innarluutillit illersuisuata innersuussutai aallaavigalugit aaqqiissutissat eqqortut nassaariniassavagut. Kommunimilu inuit innarluutillit atugai pitsaanerpaatinniarlugit peqqinnissaqarfik angalatitsiviillu aamma oqaloqatigissavagut, Kiista P. Isaksen oqarpoq.

Ilisimasanik avitseqatigiinneq

Tilioq angalanerminit nalunaarusiamini kommunimut ilaatigut innersuussutigaa sulisut akornanni ilisimalikkat avitseqatigiissutigineqartassasut, taakkulu ilinniartitsisunik ikiortinullu pikkorissaasassasut. Ilanngullugu MISI illoqarfinnut nunaqarfinnullu angalanerusariaqarpoq, meeqqat nunaqarfinniittut savaatilinniittullu qulaajaaffigineqapallattarnissaat anguniarlugu.

- Ilisimavarput inunnik ilinniarsimasunik amigaateqarluta, tamanna nalunngereerparput. Taamaammat ilisimasanik avitseqatigiittarnissat orniginarpoq, Kiista P. Isaksen oqarpoq.

- Innuttaasut pitsaanerusumik sullinneqarnissaat anguniarlugu iliuuseqalereernikuuvugut. Inunnik isumaginnittoqarfipput aaqqissuuteqqinneqalernikuuvoq, innuttaasut aalajangiisartunut aqqutissaat qaninnerulersinniarlugu. Inunnut isumaginnittoqarfimmut tamarmut tamanna tunngavoq. Taassuma saniatigut suliani pisortagut illoqarfinnut nunaqarfinnullu angalanerulernissaat siunertaraarput, innuttaasut kissaataat piumasaallu qanimut ilisimanerulerniassagatsigit, Kiista P. Isaksen nassuiaavoq.

Taassuma erseqqissaatigaa kommunip innuttaasunut sullissinera eqaallisarneqarsimasoq, innuttaasut sumiikkaluarunilluunniit saaffiginninneri tamatigut pimoorullugit tiguneqartalersillugit. Aamma kommunimi sulisut angalanngikkaluarpataluunniit.

Najukkat

Inuit innarluutillit illersuisuata isornartorsiuinerinut ilaavoq utoqqaat kommunimit neqeroorfigitittartut inissianut nooqquneqarlutik, illortillu tunisariaqaraat. Tamassumunnga pissutaatinneqarpoq illuuteqartut utoqqalillutik pitsorlulersimasarmata, allatigulluunniit ukioqqortunerulernermi innarluuteqalersimasarmata.

- Kommuni ikiuuttareerpoq, inuillu angerlarsimaffiini pisariaqartunik ikkussuinissamut ikiuuttarluni. Ilaatigulli pisariaqartarpoq najugaqartoq angerlarsimaffimmut inuit innarluutilinnut tulluarsakkamut, imaluunniit utoqqaat iniinut nuunnissamik neqeroornissaq, tassanili maluginiagassaavoq akuersinissaq innuttaasup nammineq akisussaaffigimmagu, Kiista P. Isaksen Sermitsiaq.AG-mut oqarpoq.

Kommuni kisimi akisussaasuunngilaq

Tilioq katillugit 27-inik innersuussissuteqarpoq, ilaatigut kommunimut, Namminersorlutik Oqartussanut, Naalakkersuisunut, Inatsisartunut, peqqinnissaqarfinnut allanullu inuiaqatigiinni susassaqartunut. Taamaammat Kommune Kujalleq sullissinerup pitsaanerulernissaa anguniarlugu oqartussanik allanik oqaloqateqarnissaminut piareersimavoq.

- Kommuni kisimi uani uparuarneqanngilaq. Allat aamma sullissisut uparuarneqarput, soorlu niuertarfiit aamma angalatitsiviit. Suliassaq kisimiilluta kivissinnaanngilarput, Kiista P. Isaksen oqarpoq.