Nunaqarfinni inatsisaatsuliortoqartarnera politikkerimit ernumanartoqartinneqartoq
Aaja Chemnitz Larsenip nunaqarfinni kommunefogedeqanngitsuni inatsisaatsuliortoqartarnera ernumanartoqartippaa: - Politiitut nakkutiginnittoqanngippat qanorluunniit pisoqarsinnaavoq, meeqqanut naapertuilluanngitsuliornerit ilanngullugit.
Inatsisinik atuutsitsisut nunaqarfippassuarni amigaataasimapput. Nunattali Politiivi ukiup ingerlanerani nutaanik kommunefogedissarsiornerminni iluatsitsisimapput.
Aviisi AG taamatut allappoq.
Tamatuma peqatigisaanik kommunefogedit oqaasissaqartitaanerunissaat nukittorssarniarlugu aamma inoqarfinni inukitsuni sulinermi atugassaritititaasut pitsanngorsarniarlugit aningaasaliisoqarsimavoq, ilaatigut qasilittunik seqqartaammik aamma aatsunik aqerlumit pitagassaanngitsunik atortulerneqarlutik.
Politiilli suliniuteqarnerminni anguniagartik suli angusimanngilaat.
Atorfiit 13-it inuttaqartinneqanngitsut
Folketingimi ilaasortap Aaja Chemnitz Larsenip IA-meersup danskit naalakkersuisuinut apeqquteqarneranut atatillugu tamanna saqqummiunneqarpoq. Tassungami atatillugu atorfiit qassit maannakkorpiaq inuttaqartinneqannginnersut akissuteqarfigeqqusimavaa.
- Kalaallit Nunaanni kommunefogeditut atorfiit 13-it novembarip aallaqqaataani inuttaqanngillat, politiit ilisimatitsipput, nunaqarfiillu sorliit pineqarnersut taagorlugit:
- Nunatta Politiivi nunaqarfinni arfineq-pingasuni ukunani kommunefogedinik amigaateqarput; Saarloq, Eqalugaarsuit, Qassimiut, Qassiarsuk, Kuummiut, Atammik, Sarfannguaq aamma Innarsuit. Nunaqarfinni sisamani ukunani kommunefogedip appaanik amigaateqarput; Kuummiut, Niaqornaarsuk, Ikerasak aamma Saattut. Nunaqarfimmi ataatsimi kommunefogedit pingajuannik amigaateqartoqarpoq.
Toqqissisimananngitsoq
Aaja Chemnitz Larsen isumaqarpoq, nunaqarfimmiut inatsisinik unioqqutitsisoqartillugu saaffissaqartannginnerat nunaqarfimmiunut toqqissisimanganngitsoq.
- Arlaatigut inatsisaatsutut inuusoqarpoq. Inoqarfinni tamani inatsisinik atuutsitsisunik saaffissaqarnissaa pingaaruteqarpoq. Ulluinnarni inuunermi inatsisinik atuutsitsisoqanngippat, tamatuma kinguneranik qanorluunniit pisoqarsinnaasarpoq, tamatumani meeqqanut kannguttaatsuliortarnerit ilanngullugit, taanna Ag-mut oqarpoq.
Ilanngutassiaq tamaat AG-mi atuaruk – ugguuna iserfigisinnaavat: