Aaja: Politiit aningaasarsiaat iluarsiiffigineqalerput

Aaja Chemnitz Larsenip naatsorsuutigaa, Danmarkimi Kalaallillu Nunaanni politiit aningaasarsiatigut assigiinngissutaat sapaatip akunnerata tulliani iluarsiiffigineqassasut

Politi, Katuaq, fred og ro

Kalaallit Nunaanni politiit Danmarkimi politeeqatiminnut sanilliullugu aningaasarsiakinnerusarnerat ukiorpassuarni mamiagineqartarsimavoq.

Apeqqut tamanna folketingimi qaqinneqartarsimaqaaq, maannalu folketingimi nunatsinnit ilaasortat marluullutik aningaasarsiatigut assigiinngissitsineq atorunnaarsinniarlugu sulissutigilluarpaat. Kalaallit Nunaanni Politiit Peqatigiiffiata Politiforbundet suleqatigalugu suliaq sorsuutigisimavaat.

Taamatullu suliaqarsimaneq maanna kinguneqartussatut isikkoqalerpoq.

- Aningaasarsiatigut assigiinngissitsinermut aaqqiissuteqartoqarnissaa naatsorsuutigeqqissaarpara, Aaja Chemnitz Larsen (IA) oqarpoq.

Inatsisinik atuutsitsinermut ministeri Nick Hækkerup (Soc) ataatsimeeqatigisimavaa maannalu immikkut illuinnartumik neriuuteqarneraluni.

- Naatsorsuutigilluinnarpara, sapaatip akunnerata tulliani aaqqiissutissarsisimassalluta, taanna oqarpoq.

Aningaasat aningaasanut inatsimmi

Danskit aningaasanut inatsisissaata isumaqatiginninniutigineqarnerani Kalaallit Nunaanni politiit aningaasarsiaasa qaffaassutissaannut aningaasanik immikkoortitsiniartoqarpasippoq.

Aamma Aaja Chemnitz Larsenimit (IA) eriuutigineqarpoq, parnaarussivinni sulisut aningaasarsiassa qaffaassutissaannut immikkoortitsisoqassasoq, matumanili pissutsit paasiuminaannerulaarput.

Kalaallit Nunaanni Politiit peqatigiiffiata pingaarnertut anguniagaraa, Danmarkimi Savalimmiunilu politiit isumaqatigiissutaannut ilaatinneqalernissartik. Tamatumunngali tunngatillugu maannakkorpiaq aaqqiissutissaqartoqarpasinngilaq, maannali isumaqatigiissutaasup iluani aningaasarsiat qaffaassutissaannut aningaasanik immikkoortitsisoqarniarpoq.

Danskit isumaqatigiissutaannut ilaalernissamut piffissaq sivisulaartoq ingerlasariaqassaaq, Aaja Chemnitz Larsen (IA) naliliivoq.

Powered by Labrador CMS