Cannabis pillugu misileraanissamut alloriarneq

Nakorsaatinik cannabisertalinnik misileraanissamut siunnersuutit Naalakkersuisunit akuersissutigineqarput. Tamanna akissuteqaatini atuarneqarsinnaavoq

Danskit misileraanerattut ittumik nakorsaatinik cannabisertalinnik Nunatsinni assingusumik misileraasoqarsinnaanissaa qanillivoq.

Nakorsat ataasiakkaat immikkut akuersissummik piniaqqaarnatik nakorsaatitut akuerisaanngitsumik cannabisimik nakorsaasiillutik nakorsaanissamik periarfissaqarlersillugit misileraanermik aallartitsinissamik siunnersuutit Naalakkersuisunit taperserneqarput.

Inatsisartunit siunnersuutit pingasut tunngavigalugit Naalakkersuisut akissuteqaataanni atuarneqarsinnaavoq.

Siunnersuusiortoqassaaq

Naalakkersuisut maluginiarpaat ataatsimiititaliat marluusut siunnersuutit akuersissutigineqarnissaanut isumaqatigiittumik inassutigigaat.

- Tamanna tunngavigalugu Naalakkersuisut inatsisissatut siunnersuummik suliaqaleruttorput, tassani cannabisimik nioqqutissiat THC-mik akui 0,2 procent tikillugu atorneqarsinnaalerneranik periarfissiisumik. Siunnersuut upernaanerani ataatsimiinnermi 2020-mi saqqummiunneqarnissaa naatsorsuutigineqarpoq.

Taamatut misileraanissaq Folketingimi 2016-mi akuersissutaavoq. 2018-mi januaarip aallaqqaataanit 2021-ip naanissaanut misileraaneq atuutissalluni.

Powered by Labrador CMS