IA: Naalakkersuisut umiatsiaararsorlutik aalisartut aningaasatigut ikiorserniarpaat?

Aqqaluaq B. Egedep IA-meersup, Grønlandsbankenip umiatsiaararsorlutik aalisartunut aningaasaliisarnerminik unitsitsinerata kingorna Naalakkersuisut aningaasaliissuteqarnissamik eqqarsaateqarsimanersut akissuteqaqquai

Aalisarnermut Naalakkersuisup Jens Immanuelsenip oqaaseqaammini annertuumi ataasiarluniluunniit oqaatiginngilaa, Grønlandsbanken umiatsiaararsorlutik aalisartunut aningaasaliissuteqartarunnaarmat Namminersorlutik Oqartussat aningaasaliissuteqartalerniarnersut.

Ilanngutassiaq atuaruk: Aalisarnerup ajalusoornera: Maanna iliuuseqartoqassaaq

Aqqaluaq B. Egedep paragraf 37 naapertorlugu Naalakkersuisunut apeqqutaa ima nipeqarpoq:

Naalakkersuisut nunatsinni aningaaseriviit umiatsiaararsortunut angallatitaarnissamut aningaasaliiumajunnaarnerat qanoq qisuariarfigissavaat? Aningaasalersuinernut taartissanik nutaanik Naalakkersuisut pilersitsiniarpat?

Apeqqut alla ima nipeqarpoq:

Naalakkersuisut pisariaqarsorivaat Inatsisartut Aningaasanut Inatsisissaani angallatitaarnissamut aallarteqqinnissamullu aningaasaliissutinik pilersitsisoqarnissa?

Akuersissutit nutaat nutaanngitsullu

Jens Immanuelsen Grønlandsbankenip aalajangiineranut tunngatillugu oqaaseqaatimini allappoq, ”taamaammat Qeqertarsuup Tunuata aqutsiveqarfiani qaleralinniarnermut akuersissutinik killiliisoqarsinnaanera naalakkersuisoqarfimmit sulissutigineqartoq…”

Malugalugu naalakkersuisup aalisartut nutaat matumani pimmagit. Naalakkersuisup uppernarsarpaa aalisartut ullumikkut amerlavallaartut, umiatsiaararsorlutilli aalisartut ilaasa akuersissutaannik arsaarinninnissamik pilersaaruteqartoqarnera oqaatiginngilaa.

Aqqaluaq B. Egede taamaammat aperivoq:

Qeqertarsuup tunuani aalisartut akuersissutaatillit ikilisarneqarnissaat pisariaqartutut Naalakkersuisut isumaqarpat?

Naalakkersuisut ullut qulit ingerlaneranni akissuteqartussaapput.

Powered by Labrador CMS