Amerlanerujartuinnartut Ombudsmandimut ikioqqusalersut
Ombudsmandip 2018-imut tunngatillugu ukiumoortumik nalunaarusiani saqqummiuteqammerpaa, tassanilu takuneqarsinnaavoq suliassat siusinnerusumut sanilliullugu amerlanerujussuit ombudsmandeqarfiup suliarisalersimagai
Ombudsmandeqarfiup innuttaasut siunnersorneqarnissamut saaffiginnittartut amerliartuinnartut 2018-imi misigisimavaaa. 176-eriarluni siunnersuisimavoq, tassa ukiup siulianut sanilliullugu 56-inik amerlanerusut, tassalu siunnersuisarneq 46 procentimik qaffariarsimavoq.
Naammagittaalliuuteqartut aamma 2017-imi 108-niit ukiup siulianut sanilliullugu 126-nik amerlanerusimapput.
Ombudsmandeqarfiup oqaatigaaa, saaffiginnittartut amerleriarnerannut pissutaasinnaasoq, ombudsmandeqarfiup ilaatigut video atorlugu paasititsiniaasarsimanera. Ombudsmandittaaq Vera Lethip naammagittaalliuutitut suliat oqartussaasunik isornartorsiuinani ”innuttaasunilli soqutiginarsinnaasutut naliliiffigisani” annertunerusumik tamanut saqqummiuttarnissai aalajangersimavaa.
Naammagittaalliuutitut suliat 122-t naammassineqarsimasut
Naammagittaalliuutitut suliat 122-t naammassineqarsimapput, tassa ukiuni kingullerni tallimani aatsaat taamak amerlatigisut. Suliani taakkunani suliat pingasut Ombudsmandip isornartorqartissimavai imaluunniit innersuussuteqarfigisimavai.
Ombudsmandi sisamariarluni misissuiartorsimavoq: Tasiilami Nuummilu meeqqanut inuusuttunullu ulloq unnuarlu paaqqinnittarfiit imminnut pigisut misissuiffigisamavai aamma Qaanaami utoqqaat illuat Qaqortumilu innarluutilinnut paaqqinnittarfik misissuiffigisimallugit.