Ataata anaanalu annersaasussaanngillat

Meeqqat amerlanerpaartaat isumaqarput, angajoqqaat timikkut annersaallutik pillaasarnerat ajortuusoq. Kantar Gallup-ip NAKUUSA, UNICEF Danmark aamma Institut for Menneskerettigheder sinnerlugit misissuisimanerata tamanna takutippaa.

Misissuisimanerup tamatuma aamma takutippaa, meeqqat pisinnaatitaaffiinik ilisimasaqartut ukiut tallimat kingulliit ingerlaneranni ikileriarsimasut. Kisianni anaana ataataluunniit annersaaqqusaanersoq pillugu apeqqutigineqarmat, amerlanerpaartaat isumaqarput taamaattoqartussaanngitsoq.

Pillaasinnaatitaaneq 2016-imi aatsaat atorunnaarsinneqarpoq

Meeqqat 81 procentiisa pillaasarneq pitsaasuunnginnerarpaat.

2014-imi 57 procentiinnaat taamatut isumaqarsimapput.

- Angajoqqaat meeqqamik timaasigut pillaaasussaanngitsut, tassa meeqqaminnut annersaasussaanngitsut meeqqanit ilisimaneqaleraluttuinnarnera pitsaasuuvoq, Sara Olsvig, UNICEF-imi suliniutinut pisortaq oqarpoq.

- Kalaallit Nunaanni pillaasinnaatitaaneq aatsaat 2016-imi atorunnaarsinneqarpoq, misissuinermilu angusat tamatumunnga attuumassuteqarsinnaapput, aammali meeqqat pisinnaatitaaffiinik ukkataqarnerulersimaneq tamatumalu qanoq paasisariaqarnera sunniuteqarsimassapput. Assersuutigalugu ukiuni kingullerni NAKUUSA, angajoqqaanngornissamut piareersarneq MANU meeqqallu illersuisoqarfiat MIO aqqutigalugit angajoqqaat akisussaaffiinik paasitsiniaasarnikkut. Paasititsiniaasarnerit taakku pitsaasumik sunniuteqarsimarpasipput.

Politikkikkut ingerlatseriaaseq arlalinnit ilisimaneqartoq

Meeqqat timikkut pillaasarneq pillugu aperineqaraangamik erseqqissumik isummertarnerat matumani kisimi pineqanngilaq. Tamannalu naalakkersuisumit akisussaasuusumit nuannaarutigineqarpoq.

- Meeqqat amerlanersaasa pisinnaatitaaffimminnut isummertarnerat maluginiagassaavoq, assersuutigalugu misissuinerup takutippaa, meeqqat amerlanersaasa (85 Procentit) persuttaasarnermut illersorneqarsinaatitaallutik ilisimavaat, (76 procentit) ilisimavaat sunngiffeqarsinnaatitaallutik, (57 procentit) ilisimavaat suliani imminnut tunngassuteqartuni tusaaneqartussaallutik. Misissuinermi angusarpassuit meeqqat pisinnaatitaaffiinik ilisimasaqarnermik annertusaaniarluni qulakkeerinninniarlunilu suliaqarnerup ingerlateqqinneqarnissaanut isumassarsiorfiusinnaapput, Martha Abelsen (S), isumaginninnermut akisussaasuusoq oqarpoq.

Inuiaqatigiinnilu innuttaasutut inissisimanerminnut atatillugu meeqqat ullumikkut ilisimasaqarnerupput. Meeqqat 32 procentii akipput, Kalaallit Nunaanni politikkikkut aalajangiisarnerit qanoq ingerlanneqartarnersut atuarfimmi ilinniartarlugu - 21 procentimiit qaffariarneq. Tassani “naluaramik” akissuteqartut 49 procetimiit 23 procentimut appariarsimapput.

- Pisinnaatitaaffinnik ilisimasaqalersitsiniaaneq sakkutsialaavoq meeqqat pitsaanerpaamik innuttaaqataalernissaannut, taamaammat Sara Olsvig isumaqarpoq taamatut ineriartortoqarnera pitsaasuusoq.

NAKUUSA-mi meeqqat nobembarip aallaqqaataaniit sisamaanut ataatsimeersualerpata Meeqqat pisinnaatitaaffii pimoorullugit oqaluuerineqassapput kiisalu novembarip 20-ani FN-ip Meeqqat pillugit isumaqatigiissutaata ukiunik 30-nngortorsiornerani.

Atuarfinni 13-ini 6. klassimiit 10. klassimut atuartut 491-it misissuinermut peqataasimapput.