Nunanut allanut ministerip Kalaallit Nunaata peqataatinneqarnerunissaa eqqartorniarpaa
Jeppe Kofod Nuummiinnermini nunanut allanut isumannaallisaanermullu tunngasutigut ingerlatsinermi suleqatigiinnerunissaq peqataatitsinerunissarlu eqqartorniarpai
Nunanut allanut ministerip Jeppe Kofodip (Soc) Nunanut Allanut Naalakkersuisoq Ane Lone Bagger (S) peqatigalugu Naalagaaffeqatigiinni nunanut allanut isumannaallisaarnermullu tunngasutigut ingerlatsinermi qanoq suleqatigiinnerusoqarlunilu peqataatitsinerusoqarsinnaanersoq pillugu isumassarsiat oqaluuseriniarpai. Nunanut allanut tunngasutigut suliaqarnermi 'suliniutit tigussaasut nutaat aqqutigalugit Naalagaaffeqatigiinni tamarmiusuni nunanut allanut tunngasutigut qanoq ingerlatsisoqarsinnaanera takutinniarpaa.
- Nunanut allanut ministeritut Kalaallit Nunaannut tikeraaqqaarnissara qilanaareqaara. Danskit naalakkersuisuinut uannullu pingaarutilipilussuuvoq, Naalagaaffeqatigiinni tatigeqatigiilluni ataqqeqatigiillunilu naligiimmik pitsaasumillu suleqatigiiinnissaq. Nunanut allanut tunngasutigut suleqatigiinnerunissamik isumassarsiat tigussaanerusut erseqqissumik oqaluuserinissaannut tikeraarneq periarfissatsialaavoq - aamma nunarsuarmiut Kalaallit Nunaannut Issittumullu tunngatillugit soqutiginnikkiartuinnarnerat eqqarsaatigalugu, Jeppe Kofod tusagassiorfinnut nalunaarut naapertorlugu taamatut oqarsimavoq.
Nuummut ullumi tikissaaq, tassungalu atatillugu Naalakkersuisut nunanut allanut tunngasutigut naalakkersuinikkut ingerlatsineq pillugu nassuiaammik Inatsisartuni ukiumoortumik saqqummiussinerat malinnaaffiginiarpaa.
Nunanut allanut ministerip tikeeraarnermini aamma nunatsinni inatsisartut naapinniarpai kiisalu kalaallit ilisimatusarfimmi ilinniartut nunanut allanut tunngasutigut ingerlatsisarneq pillugu oqaloqatiginiarlugit.
Tamakkua saniatigut Issittup Kalaallillu Nunaata inissisimaneranik soqutiginnikkiartuinnarneq kiisalu Illersorissaqarfiup Issittumi Atlantikullu avannaani suliassai pillugit Arktisk Kommando oqaloqatiginiarlugu.
Jeppe Kofodip nunatsinni inuussutissarsiortut sinniisaat naapissavai, Nuummi umiarsualivik timmisartoqarfiliornerlu takusassavai erngullu nukinganik nukissiorfik pulaarniarlugu.
Pingasunngornerup tungaanut tikeraassaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...