Peqqinnissaq pillugu ataatsimiititaliarsuarmik pilersitsinissaq amerlanerussuteqartunit ilalerneqartoq
Inatsisartuni peqqinnissaqarfiup pitsaanerunissaa sisamanngormat amerlanerussuteqarluartunit tapersersorneqarpoq. Peqqinnissaq pillugu ataatsimiititaliarsuarmik peqqinnissaqarfiup pitsanngorsaavigineqarnissaanut ingerlaavartumik inassuteqaateqartussamik pilersitsinissamik siunnersuut sisamanngornermi oktobarip 10-ani partiinit amerlanernit taperserneqarpoq.
Innuttaasut siunissami ukiorpassuarni peqqinnissakkut ataqatigiissumik ullutsinnullu naleqquttumik kiffartuunneqarsinnaaqqullugit Inatsisartunut ilaasortaq Tillie Martinussen (Suleqatigiissitsisut) isumaqarpoq, peqqinnissaq pillugu ataatsimiititaliarsuarmik politikerinut piviusunik inassuteqaateqartartussamik pilersitsinissaq pisariaqartoq.
Aviisi Sermitsiaq taama allappoq.
Tillie Martinussenip siunnersuutaa Inatsisartuni oktobarip 10-ani oqaluuserineqarpoq.
– Sulisussarsiortarnermik, suliamik ingerlatsilluarsinnaanermik, taartaasartut amerlavallaarnerannik, nakorsaatit akisunerulernerannik kiisalu innuttaasut utoqqaliartornerannik inooriaatsillu kinguneranik napaatit amerliartornerannik ajornartorsiuteqarpugut. Aamma nappaatinik nalinginnaasunik eqqortumik katsorsaasarneq ajornartorsiutaavoq, minnerunngitsumillu peqqinnissaqarfiup tigunerata kingorna suliassaqarpallaarnermik tamanna pissuteqarpoq, Tillie Martinussen, Inatsisartuni sapaatip-akunnerani kingullermi sisamanngornermi Naalakkersuisut peqqinnissaq pillugu ataatsimiititaliarsuarmik pilersitsinissamik suliaqarnissamut peqquneqarnissaannik aalajangiiffigisassatut siunnersuutini saqqummiukkamiuk tunngavilersuivoq.
Siunnersuut ilaasortanit Naalakkersuisunillu tapersersorneqaraluarluni akunnerni arlalinni oqaluuserineqarpoq.
Siunnersuut peqqinnissaq pillugu ataatsimiititaliarsuup peqqinnissaqarfiup ataatsimut isigalugu pitsanngorsarnissaanut inassuteqaatinik suliaqartarnissaanik, pingaartumillu sulisussarsiortarneq, sulisooreersunik sulisoqaannartarneq kiisalu Danmarkimik nunanillu allanik suleqateqarneq pineqartillugit, siunertaqarpoq.
Siunnersuummi aamma oqaatigineqarpoq, peqqinnissaq pillugu ataatsimiititaliarsuup inassuteqaatai tassaassasut Inatsisartuni peqqinnissakkut aaqqiissuusseqqinnissamut naalakkersuinikkut tunngavissat, peqqinnissaqarfimmilu sulisunut tamanut kattuffiit kiisalu soqutigisartut allat Kalaallit Nunaanni peqqinnissaqarfimmut tunngasunik ilisimasaqartut ataatsimiititaliarsuarmut sinniisuutitaqassasut.
Naalakkersuisut peqqinnissaqarfiup iluani peqqinnissamut tunngasuni aaqqissuusseqqinnissamik pisariaqartitsisoqarnera isumaqataaffigaat, aamma tamatumunnga suliamik aallartitsereersimanerarput, peqqinnissaqarfimmi suliassanik isumaginninnerup isumalluutitigullu unammillagassat maannakkorpiaq naalakkersuinikkut isummerfigineqarnissaat pisariaqarmat.
Siunnersuut pillugu aviisimi Sermitsiami atuarnerusinnaavutit: