Siunnersuut: Nuna tamakkerlugu qimussersuarmik ukiut pingasukkaarlugit unammersuarneq

Kalaallit Nunaanni Qimussertartut Kattuffiat, KNQK, Ilulissani ulluni makkunani ataatsimeersuarpoq.

Ataatsimeersuarnermi siunnersuutit oqaluuserineqartussat ilagaat qimussimik unammersuarneq ataqqinaataasoq ukiut pingasukkaarlugit nuna tamakkerlugu unammersuarnertut ingerlanneqartalissasoq.

Nuna tamakkerlugu qimussimik unammersuarneq taaneqartassaaq Avannaata Qimussersui, Avanersuarmiut, Kangiamiut Avannaamiut nunallu sinnerani qimuttunik qimmeqartut, peqataaffigisinnaasassaat.

- Qimussertartut tamarmik naapiffigisinnaasaannik massakkut unammersuartoqartanngilaq, sumiiffiit aalajangersimasut maanna atuuttut kisimik unammiffiusarput. Nuna tamakkerlugu unammersuartoqartalernissaa aamma pingaartipparput, Hansiaraq Zeeb, KNQK-mi allattaaneq Sermitsiaq.AG-mut oqaluttuarpoq.

Aningaasalersornera

Siunnersuut akuerineqassappat aningaasartaqangaatsiartussaavoq.

KNQK aningaasanut inatsimmi 350.000 koruuninik ukiumut taperneqartarpoq. Aningaasat qimussimik sukkaniunnernut assigiinngitsunut atorneqartarput, soorluttaaq ukiut tamaasa Avannaata Qimussersua-nut, Upernavimmiit Sisimiut tungaanut qimmeqartut unammiffigisartagaannut, peqataasunut atorneqartartut.

Siunnersuut akuerineqassappat KNQK Inatsisartunut saaffiginninnissaminut piareersimavoq, aningaasaliissutit 750.000 koruuninut qaffanneqarnissaat qinnutigiumassallugu. Nuna tamakkerlugu unammersuarnissaq siulleq 2021-mi pissasoq siunniunneqareerpoq.

Nuna tamakkerlugu qimussimik sukkanniulluni ukiut pingasukkaarlugit unammersuartoqartalernissaanut suliniutit pisariaqartut naammassiumallugit aningaasaliisartunut Inatsisartunullu aningaasat katillugit 1,5 milliuunit koruunit aamma qinnutigineqassapput.

Alloriarneq tulleq

Hansiaraq Zeeb ilisimatitsivoq siunnersuut akuerineqarniariarpat suliniutit pisariaqartut aallartinneqariaannaasut.

Siunnersuut malillugu nuna tamakkerlugu unammersuarnerup, Avannaata Qimussersui, ukiut pingasukkaarlugit ingerlanneqartarnissaata saniatigut, unammersuarnerit maanna ingerlanneqartareersut, Avannaata Qimussersua, Inughuit Qimussersua, Kangiata Qimussersua illoqarfinnilu assigiinngitsuni qimussimik sukkanniulluni unamminerit, kiisalu meeqqat qimussersuaarai, ukiut tamaasa ingerlanneqartassapput.

KNQK ullumi aqagulu ataatsimeersuassaaq.