Sanaartoriaaseq isornartorsiorneqartaqisoq misissorneqartoq
Sanaartornermut oqartussat Unaami Nuummiitumi inissiat periuseq Kalaallit Nunaannut naapertuuttoq atorlugu suliarineqarsimanersut misissorlugu aallartissimavaat.
Unaarmiut Namminersorlutik Oqartussat inissiaatileqatigiiffiutaata Illuut A/S-p sanatissimasaanni najugaqartut, inissiani nutaani qiianartarpallaarnera suerpallaartarneralu naammagittaalliutigisimavaat.
Atorneqarsinnaasoq atorneqarsinnaanngitsorluunniit
Apeqqutaavoq periuseq atorneqarsinnaasoq atorlugu sanaartortoqarsimanersoq.
Ineqarnermut Naalakkersuisup Karl Frederik Danielsenip Sofia Geislerip paragraf 37 naapertorlugu apeqqutaanut akissuteqarnermi ilisimatitsissutigaa, ”Ineqarnermut Attaveqaatinullu Naalakkersuisoqarfimmi Sanaartornermut Oqartussat Unaami inissiat aamma Namminersorlutik Oqartussat Unaami inissianut assigusumik inissialiaat allat misissorlugit aallartissimagaat. Tassani siunertaralugu, sanaartoriaaseq Kalaallit Nunaanni atorneqarsinnaannngitsoq atorlugu sanaartortoqarsimaneraaneq ilumoornersoq ilumuunnginnersorluunniit paasisaqarfiginiarlugu, tassami Namminersorlutik Oqartussat sanaartortitaanni taamatut ajornartorsiuteqartoqarneranik misigisaqartoqarsimanngimmat”.
Misissuineq naammassippat, nalunaarusiaq Illuut A/S-imut ingerlateqqinneqassaaq, Karl Frederik Danielsen sanaartornermi suut atorneqarnissaannik naalakkersuisoqarfiup
aalajangeeqataasimanerangaaneranik itigartitsisoq oqarpoq.
Kina akisussaasuua?
Naalakkersuisoq aamma ilisimatitsivoq, sanaartortitsisoq Illuut A/S tassaasoq ajornartorsiutinut suut pissutaanersut pillugu aalajangiisuusussaasoq, taamalu kina akisussaasuunersoq pillugu paasissutissiisussaasoq. Aamma sanaartortitsisoq tassaavoq iluarsisassanut aningaasaliissuteqartussaq.
- Sanaartortitsisup akisussaaffigaa paasiniassallugu atortussanik kukkusumik toqqaasoqarsimanersoq, sannarluttoqarsimanersoq, sanaartornermi kukkusoqarsimanersoq, sanaartornermi aqutsisoqarsimannginnersoq imaluunniit naammaginanngitsumik aqutsisoqarsimanersoq aamma/imaluunniit nakkutilliisoqarsimannginnersoq allatulluunniit
iliuuseqartoqarsimanersoq akisussaaffimmik inissiinissamut sunniuteqarsinnaasumik, akissuteqaammi ilisimatitsissutigineqarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...