Kim Kielsen: Nunatta soqutigisai salliunneqartuassapput

Nunanit allanit, ingammik USA-mit, Kalaallit Nunaata soqutigineqaleraluttuinnarnera atorluarneqartariaqartoq Naalakkersuisunut Siulittaasoq Kim Kielsen tusagassiortunik katersortitsinermi oqarpoq. - Soqutigisagut salliutinneqartuassapput, oqarpoq

Donald Trumpip Kalaallit Nunaata pisiarineqarnissaanik soqutiginnilluni oqariartuuteqareersoq Kalaallit Nunaat aamma Issittoq aatsaat taama nunanit tamalaanit soqutigineqartigilerput.

Kalaallit Nunaat tuniniagaanngitsoq Hans Egedep Illuani tusagassiortunik katersortitsinermi Kim Kielsenip naqissuserpaa.

Kalaallit Nunaata immikkoortuani pisussat Kalaallit Nunaata nammineerluni aqussagaa aamma tikkuarpaa.

- Issittumi periarfissat tungaatigut kikkut tamat maannakkut malinnaapput. Niuernikkut aatsitassarsiornikkullu periarfissat takkussuupput. Periarfissat eqqarsaatersuutigisariaqarput, Kim Kielsen oqarpoq.

Kim Kielsen: Ataqqineqassaagut

Kalaallit Nunaanni pisunut kalaallit aqutsisuusariaqartut oqaatigaa.

- Nunatsinni inatsisigut naapertorlugit malinneqassapput, taakku saniatigut Naalagaaffeqatigiinnermi illersornissamut tunngasut aamma malinneqassasut naatsorsuutigaarput. Taamaammat pingaartorujussuuvoq uagut Kalaallit Nunaat soqutigisagut salliutinnissaat - tamatigut. Avataanit aqunneqassanngilagut, Kim Kielsen oqarpoq.

Powered by Labrador CMS