Pequtaarniarfiup aningaasanik pisassallit annaasaqarterujussuarpai
Nuummi pequtaarniarfik Home Sweet Greenland akiliisinnaangajalluinnaraluarpoq, Pisiffiulli piffissaq kingulleq atorlugu pequtaarniarfik pisiaraa. Aningaasanik pisassallit Danmarkimeersut Kalaallit Nunaanneersullu annaasaqarujussuarput.
Pequtaarniarfimmik pilersitsisuusoq pisortaasorlu Jan Køhler piffissami sivitsortumi aningaasarliorpoq, naggataatigullu tamanna bankimut naammalluinnalerpoq, atorniartitseqqikkumajunnaarpormi.
Bankip tapersersuiunnaarnerata kingorna Jan Køhler ilungersornerulerpoq, iliuuseqapallannikkulli pequtaarniarfik ingerlaqqissinnaalerpoq, Pisiffiummi pisiaraa.
Qanoq iliusissaarutivittut
Aningaasanik pisassallit annerit, tassa akiliiffigineqartussaasut, Danmarkimiittut Kalaallit Nunaanniittullu Vejlemi Codeks Advokateriniit pingasunngornermi juulip qulingani allagarsitinngeqarput: Akiitsut akilerneqartussat 80 procentiisa akilerneqanngitsoornissaat akuerisiuk imaluunniit aningaasaatisi tamaasa annaasigit, akuersinngikkussimi pequtaarniarfik akiliisinnaajunnaassaaq.
Aningaasanik pisassallit akunnialuinnarni eqqarsarnissaminnut periarfissinneqarput. Ulloq naatinnagu akissuteqaqquneqarput, bankimmi pequtaarniarfik periarfississimavaa ulloq taanna naatinnagu aaqqiissutissamik nassaassasoq, taamaanngippat akiliisinnaajunnaartutut nalilerneqassasoq.
Aningaasanik pisassallit aningaasaatimik 20 procentiisa tiguinnarnissaat akuerisimagaat, Sermitsiaq.AG-p paasivaa.
2018-imi kinguartitsigallarnissaanikakuerineqartoq
Aningaasanik pisassallit pequtaarniarfik aningaasarliortoq februarimi martsimilu 2018-imi paasivaat. Pisortaq Jan Køhler akiliinissamut kinguartitsigallarnissamik piumasaqarpoq, tamannalu akuerineqarluni.
Jan Køhler attavigineqarniarsimagaluarpoq iluatsinngitsumilli, niuertarfimmi sulisup ilisimatitsinera naapertorlugu taanna maannakkut sulinngiffeqarluni Ruslandimi angalavoq.
Sweet Home Greenland ApS-ip 2018-imut naatsorsuutai kingulliit naapertorlugit pequtaarniarfik 2,4 milliuunit koruuninik amigartooruteqarpoq, aningaasallu nammineq pigisai -1,5 milliuunit koruuniullutik.
Ingerlatseqatigiiffik nutaaq pilersinneqarpoq
Det Centrale Virksomhedsregister, tassa suliffeqarfiit pillugit qitiusumik nalunaarsuiffik, naapertorlugu Jan Køhler piginneqatigiiffimmik nutaamik juulip aqqarnani pilersitsivoq. Tassani allassimavoq Sweet Home Greenland ApS nutaamik ateqalersoq, ima ateqalerluni: Selskabet af 11. juli 2019 ApS, aamma Grønlands Gulventreprise ApS-imik taaneqarsimalluni.
Selskabet af 11. juli 2019 ApS aningaasanik 125.000 koruuninik nammineq pigisaqartutut nalunaarsorsimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...