Amerikamiut siunnersuisartut: USA-p aamma Danmarkip Kangerlussuaq akilertariaqarpaat
Amerikami isumalioqatigiittartut Heritage Foundationip Kalaallit Nunaannik suliaqarnerunissaq inassuteqaatigaa. Tamanna Pituffimmi kiffartuussinermut isumaqatigiissummik ajornartorsiornerup aaqqiivigineqarnissaanik ilaqassaaq.
Isumasioqatigiittartut, amerikamiut politikeriinut siunnersuisartut, USA-p Kalaallit Nunaannut atassuteqarnini qanoq nukittorsarsinnaaneraa pillugu arlalinnik siunnersuusiorsimavoq.
Aviisi Sermitsiaq taama allaaserisaqarpoq.
Isumasioqatigiittartut Heritage Foundation, maajip aallartinnerani allakkiamik saqqummiussipput, amerikamiut nunanut allanut tunngasunut ministeriata tikeraarnissaa sioqqutiglaarlugut. Inassuteqaatit ajunngitsuliorniarnermik kissaateqarnermik tunngaveqanngillat, kisianni Kalaallit Nunaata USA-p isumannaatsuunissaanut pingaaruteqassusaanut tunngavoq.
- Kalaallit Nunaata nunarsuarmi inissisimaffimmigut USA-mut Canadamullu qanittumiinnera eqqarsaatigalugu Kalaallit Nunaat Amerika Avannarlermut aningaasaqarnikkut uissuumminartumik ikittuinnarnik attaveqarfeqarpoq, allakkiamik allagaqartoq, Luke Coffey taama allappoq.
Inassuteqaatit imaapput:
- Kangerlussuup Mittarfia attatiinnarneqassasoq, aamma USA-p Danmarkimillu tassunga aningaasartuutit avitseqatigiissutigisassagaat.
- USA-p politikkit USA-p Kalaallit Nunaatalu akornanni aningaasaqarnikkut qilerutinik ineriartortitsisut malinniassagai
- USA-p Danmarkimi illersornissaqarfik qaninnerusumik suleqatigissagaa.
Allakkiap aallartinnerani aamma atuarneqarsinnaavoq, Pompeop tikeraarnermini ”aaqqiagiinngissutit USA-p Thule Air Basemi aserfallatsaaliinermut assartuinermilu isumaqatigiissutinik nammineq suliffeqarfiutiminut tunniussisimanerata kinguneranik pilersimasut aaqqiiviginiarnissaat pisussaaffimmisut inissisimalersinniarsarissagai, Kalaallit Nunaannullu aningaasaqarnikkut attaveqarnerit annertusarnissaanut periarfissat misissussagai”
Allakkiaq inassuteqaammik allamik ilaqarpoq, taanna piviusunngortinneqalereerpoq: Tassa Amerikamiut konsuleqarfiannik imaluunniit konsulip allaffianik ammaaneq.
Allakkiaq pillugu Sermitsiami paasisaqarnerusinnaavutit, taanna uani ataani linki aqqutigalugu isissutissarsiffigisinnaavat: