Nukissiorfiit: Akinik aaqqissuusseqqinneq pilersaarutaareerpoq
Akinik aaqqissuusseqqinnermi tupaallannartoqanngitsoq Nukissiorfiit naqissusiivoq
Sermitsiaq.AG-ip ullumi sisamanngornermi allaaserivaa akinik aaqqissuusseqqinneq naatsorsuutigisamit akisunerujussuusimasoq. Tamanna eqqortuunngitsoq Nukissiorfiit tusagassiutinut nalunaarummini naqissusiivoq.
- Allaaserisami issuarneqarpoq Nukissiorfiit isertitaat 153 mio. koruuninik annikillisimasut. Eqqorpoq Nukissiorfiit 153 mio. koruunit atuisartunut akikinnerulersitsinermut nuussimammagit aamma Nukissiorfiit kaaviiaartitaat 153 mio. koruuninik apparsimammata. Tamanna Naalakkersuisut Nukissiuuteqarnermut imermillu pilersuinermik immikkoortumut pilersaarutaannut novembari 2017-imeersumut naapertuuppoq. Tassani qupperneq 26-imi atuarneqarsinnaavoq, tassa:
'Akinik iluarsaaqqinneq kikkunnut tamanut sipaaruteqarfiussaaq – atuisartut inuinnaat aamma inuussutissarsiorneq. Inuiaqatigiinni tamakkiisutut sipaarutaasaaq 150 mio. kr.-t missaannik annertussuseqassaaq.'
- Taamaattumik Nukissiorfiit isertitaqarnerannut tunngaviusut ilisimaneqareerput assigiimmik akeqartitsinermut iluarsaaqqinnerup atuutilernissaanik aalajangiisoqarmat.
Allaaserisaq nangillugu issuarneqarpoq Nukissiorfiit naliliutiminnik 1,6 mia. koruuninik nalikilliliisimasut.
- Kisitsit eqqorpoq tamatumunngalu pissutaavoq Nukissiorfiit 1. januaari 2018 aallarnerfigalugu Ukiumoortumik naatsorsuusiortarnermut inatsit naapertorlugu naatsorsuusiortalernera, tassani naatsorsuusiortarnermut aalajangersakkat malinneqarput suliffeqarfittut C-tut naatsorsuusiortoqarluni. Ukiumoortumik naatsorsuusiortarnermut inatsimmi pigisat nalillit nalilerneqartarnissaannut piumasaqaatit sukanganerupput, tassa suliffeqarfinnut namminersortitanut naatsorsuusiortarnermut maleruaqqusanut sanilliussilluni.
- Nukissiorfiit maleruaqqusat nutaat naapertorlugit nalinik appartitsivoq 1,6 mia. koruuninik, tamatuma kinguneraa ukiumoortumik nalikilliliinerit 106 mio. koruuninik appartinneqarnerat.
Nukissiorfinni tulluusimaarutigaarput innaallagissamut aamma imermut nuna tamakkerlugu akigitinneqartut appasinnerulernissaannik anguniagaq eqqortissinnaagatsigu, kiisalu pisariillisaanerit aamma naleqqussaanerit aqqutigalugit 153 mio. koruunit inuiaqatigiinnut ingerlateqqissinnaagatsigit akigitinneqartunik appartitsineq aqqutigalugu, tusagassiutinut nalunaarummi taama allaqqavoq.