Aleqa Ineqilu oqallinnerup nalaani assortuutilersut
KNR-TV-p folketingimut qinigassanngortittunik ippassaq unnukkut oqallitsitsinerata nalaani folketingimut ilaasortaq Aleqa Hammond (NQ) aamma folketingimut qinigassanngortittoq Ineqi Kielsen (S) assortuutileraluarput.
KNR-TV-p folketingimut qinigassanngortittunik kalaallisut oqallitsitsinerata nalaani Aleqa Hammondip Folketingimi suliai pillugit isornartorsiuineq, Aleqa Hammondip Ineqi Kielsenillu akornanni assortuunnermik kinguneqarpoq.
Ineqi Kielsenip Aleqa Hammond Kalaallit Nunaat pillugu ataatsimiititaliami siulittaasunngortinneqarmat partiinit akilerneqarsimanerarlugu taavaa. Taamaasiornermini Aleqa Hammond, Siumumit ilaasortaajunnaarluni attaviitsunngorsimasoq, danskit naalakkersuisuisa siunnersuutaannut pingaaruteqartunut akuersisartussanngorpoq.
- Taavaasiit oqartoqassooq naggataatigut ”køb en grønlænder”, Ineqi Kielsen (S) oqarpoq, Aleqa Hammondip Kalaallit Nunaat pillugu ataatsimiititaliami siulittaasunngortinneqarsimanera taamatullu danskit naalakkersuisuinut Venstremut tapersersortitut inississimanera tunngavigalugu.
Taama oqarneq Nunatta Qitornaata qineqqusaartitaannit tigulluarneqanngilaq.
- Siumuminngaanniit asuli oqarnertut taarusuppara. Aatsaannguaq oqaatsikka tusarnaarsimanngilai, Aleqa Hammond oqarpoq.
Kina statsministerinngussava
Oqallinnermi immikkoortumi kingullermi kina statsministerissatut partiit tikkuarneraat pillugu oqallittoqarpoq. Partiinili arfineq-marluusuni qinigassanngortitaqartuni, partiit marluk oqallinnermi tassani oqaaseqarnerunissaminnut periarfissinneqarput. Siumut Nunatta Qitornaataalu assortuussutigaat kina Kalaallit Nunaannut pitsaanerpaanik kinguneqartumik suliaqarsinnaanersoq.
Siumut Socialdemokraatinik suleqateqareerpoq, partiilu Mette Frederiksen statsministerissatut tikkuarpaa. Aleqa Hammondip qalleqqissarpaa Siumut Socialdemokraatinik tapersersuilereertut naak nalugaluarlugu partiip Kalaallit Nunaat pillugu naalakkersuinikkut tunngavissaat qanoq isikkoqarnersoq.
- Qanoq isilluni nunatta sinniisuatut nunatta nipaa ersarinnerpaaq folketingimi anguneqarsinnaava tikkuareerlugu kina ministeriunerulissanersoq, nunarput pillugu naalakkersuinikkut tunngavissani allanngikkaaluunniit suli? Uanga isumaqarpunga taanna isumatusaarnerunngitsoq, oqarpoq.
Qineqqusaarutit
Ineqi Kielsenip ersarissarpaa Siumup Socialdemokraatit suleqatigigai, partiip Kalaallit Nunaata namminiilivinnissaa pillugu suliaq pimoorummagu. Taassuma erseqqissarniarsaraa Aleqa Hammond folketingimi ilaasortaanermini suliaqanngippallaarsimasoq qinigaaffimmilu tassani tigussaasunik naammassisaqarpallaarsimanngitsoq.
- Taamaappat Socialdemokraatit qineqqusaarutaat qineqqusaarutigisimavaat, Aleqa Hammondip Ineqi Kielsen oqalunnerani qalliinnarlugu oqarpoq, Ineqi Kielsen uumitsatsingaatsiarlugu.
- Qallerarniannga takanna. Kisianni eqqaamaqquara Aleqamut oqarluartaarnerit naammanngimmata. Aleqap sulisimanera ukiuni sisamani tulliuttuni uparuartorsinnaavarput aamma, Ineqi Kielsen naggasiivoq.
Oqallinnerup nalaani Ineqi Kielsen aviisimut AG-mut innersuussaqarpoq, Aleqa Hammondimik folketingimi suleqatiginnissimasut arlallit suliaanut suliaqanngippallaarneranullu isornartorsiuisimanerat pillugu. Aviisi AG uani ataani pissarsiarisinnaavat: