Mittarfeqarfiit naatorsuutaat kukkunersuiusut nangaanartoqartippaat
Kangerlussuarmi mittarfiup aamma saavanik, Mittarfeqarfiup 290 millionit koruuninik naleqarnerarlugu nalilersimasaanut, kukkunersiuisut nangaanartoqartitsipput.
Mittarfeqarfiit 2018-imut naatsorsuutit inerneri kukkunersiuisumit oqaaseqaasiorfigineqarsimasut, nangaanartoqartut saqqummiuppaat.
- Aqutsisut nalunaarutaanni atuarneqarsinnaasumi, nalit appartinneqarnissaannut pisariaqartumut mittarfiup nunap ataani pissutsit allanngorneri pissutigalugit ajoqusersimanerit pillugit 31.12.2018-imeersumi uppernarsaatilimmik aqutsisut tunngavissaqanngillat – imaluunniit maanna Kalaallit Nunaanni mittarfiit aaqqissuussaanerat pillugu allannguinissamut isumaliutersuutigineqartut pillugit, kukkunersiuisartut Deloitte taama allapput, nangillutillu:
- Taamaattumik Kangerlussuarmi mittarfiit, saavani inissat ilaasalu 290 millionit koruuninik nalilerneqarnerinut nangaanartoqartitsivugut.
26,2 mio.kr.-nik amigartoorneq
Mittarfinnik ingerlatseqatigiiffiup ukiumut naatsorsuutinik inerniliussai amigartooruteqaqqipput. Katillugu 26,2 millionit koruuninik, tamannalu 2017-imi angusanit annikinneruvoq, tassani 37,7 millionit koruuninik amigartooruteqarami.
Ilaasut amerlassusaat 2018-imi ukiup siulianut sanilliullutik 413.387-nit 443.535-inut amerleriarput, tamannalu naatsorsuutit sinneqartooruteqartilernissaannut naammanngilaq.
- Mittarfinni suliaqarnerulerneq akissarsianut aningaasartuuteqarnerulersitsivoq, taakkunannga amerlasuut qaangiuttoornernut akiliinernut atorneqarlutik, aqutsisut ukiumoortumik nalunaarumminni oqaaseqarput.
Sulisut amerlanerusut
Ukiumut suliarisinnaasat amerlassusaat 2018-ip ingerlanerani ukiunik 19-inik amerleriarput, ingerlatseqatigiiffillu aamma ilinniarnermut immikkoortortamik tunngaviliivoq, taanna ilinniakkanik 19-inik ingerlatsitsiviuvoq.