Mittarfiit: Milliardinik akilimmik aserfallassimasut
Mittarfinnik ingerlatseqatigiiffik aserfallatsaaliinissamut milliardit koruuninik akilimmik kinguleruttooqqavoq.
Mittarfeqarfiit Kalaallit Nunaanni suliffeqarfiit annersaasa ilaat 400-t sinnerlugit sulisoqartoq, ingerlatseqatigiiffiuvoq aserfallassimaqisoq nutarterneqartariaqartorlu.
Ukiumut naatsorsuutit inernerini saqqummiunneqaqqammersuni tamanna atuarneqarsinnaavoq. Mittarfinnik ingerlatseqatigiiffik ilanngaatissat ilanngaatigereerlugit Namminersorlutik Oqartussat ataanni ingerlatseqatigiiffiusoq, mittarfinnik 13-inik aamma qulimiguulinnut mittarfinnik 14-inik ingerlataqarpoq.
”Unammilligassaq”
Illut, mittarfiit aamma atortut aserfallatsaalineqarnissaat kinguleruttut naatsorsorneqarsimasut pillugit pisortat ima allapput:
- Tamanna mittarfeqarfinnut annertuumik piffissaq qaninnerusoq ungasinnerusorlu eqqarsaatigalugit unammilligassaavoq.
Kingulerunneq isumannaallisaanerup qaffasissusaanut sunniuteqanngitsoq, pisortat oqaatigaat, tamannami aningaasaliisoqaleraangat siulliunneqartuaannarmat.
Akiliinissaq killilerneqanngitsoq
Aserfallatsaaliinermut kingulerunneqartut 1.066 millionit koruunit pillugit pisortat ima aamma allapput:
- Aningaasaliinissamut pisariaqartitsineq piffissami aalajangersimasumi akilerneqartussatut aalajangigaanngillat, imaluunniit mittarfiit illersorneqarsinnaasumik isumannaatsuunikkut iluarsartuunneqartariaqarnerat pineqanngilaq, aningaasaliinerit pisariaqartut salliutinneqartuaannarmata aamma sanaartugassanut aningaasaliissutitigut aningaasalersorneqarmata.
Naammaginartuunissaanut unammilligassat
- Sanaartornermut aningaasaliissutit mittarfiit illui atortuilu pisariaqartinneqartumik naammaginartuunissaannut tapiissutaassapput. Ukiumoortumik nalikilliliinerit aningaasaleeqqinnissamut takussutissaasut, tassa mittarfiit illuisa atortuilu naammaginartuunissaannut pisariaqartinneqarmata, sanaartornermut aningaasaliissutissanit annerujussuummata mittarfiit illuisa atortuisalu aserfallassimaqinerat pineqarpoq.