PN-ip ilinniarnermi aarsigassaqarlutik angerlartut isumakkeerfigisarniarpai

Danmarkimi ilinniartut ilinniakkaminnik naammassinnillutik angerlarnissartik aalajangeraangamikku akissarsitinneqartassapput. Partii Naleqqap folketingimut qinigassanngortitaa, Pele Broberg taama isumaqarpoq.

- Ilinniartut angerlarnissartik toqqarpassuk, taava ilinniarnermut ikiorsiissutinut taarsigassarsiaasa erniaqarunnaarlutillu akiligassaajunnaarnissaat sulissutiginiarpara, taanna marlunngormat Nuummi Katuami qinersisartunik ataatsimiititsinermi taama oqarpoq.

Ilinniartut amerlanerusut angerlartalernissaannut pilerisaarnissaannik periarfissatut taassuma isigaa, taamaalillutik kalaallinut inuiaqatigiinnut tapeeqataallutik namminiilernissamut peqataaniassammata.

Aaja Chemnitz Larsenip (IA) isumassarsiaq qiimmatsaatiginngilaa, inuusuttut angerlarnissaannut kimigiiserfiginiarneqarnerattut isigalugu.

- Amerlanerpaat angerlarusuttarput angerlartarlutillu. Ukiorpaaluit qaangiukkaangata aallaqqittarnerat ajornartorsiutaavoq. Maani nunatsinni pissutsit isiginiagassaraagut, taanna oqarpoq.