PET: Kukkuneruvoq uggornartoq

Politiit isertortumik paasiniaasartuisa, PET, Sulisitsisut sisamanngormat ataatsimiititsinerani iliuuserisartik utoqqatsissutigaat, tassani PET-p Sermitsiaq.AG ataatsimiinnermut peqataanissaa aamma ataatsimiinnermit issuaanissaa itigartitsissutigaa.

Sermitsiaq.AG sisamanngornermi ataatsimiinnermit ilanngutassiornissamut periarfissinneqannginnera, PET-p nassuerutigalugu utoqqatsissutigaa. Ataatsimiinnerup aallartinnissaanut akunneq ataasiinnanngortoq, tusagassiortup tikilluaqqusaannginnini paasivaa.

Paatsiveerunneq

- Ataatsimiinnermut qaaqqusisut pisariaqartumik ataqatigiissaareqatiginissaat PET-mi qulakkeersimanngilarput, taamaattumillu qaaqqusissutit aamma peqataasut naammaginartumik paasilluanngilagut. Taamaattumik ataatsimiinneq sioqqullugu tusagassiortut peqataanissaat PET-mit paasineqarsimanngilaq. Ataatsimiinnerup aallartinnissaanut akunneq ataasiinnanngortoq tamanna paatsuungalersitsivoq, tamatumalu kinguneranik Sermitsiaq.AG pisinnaatitaanngitsumik ataatsimiinnermut isertussaatinneqanngilaq. Tamanna pisariaqanngilluinnaraluarpoq, PET tusagassiortunut oqaaseqartartua Sermitsiaq.AG-mut taama oqarpoq.

- Kinamiut Kalaallit Nunaanni aningaasaliinerat pillugu paasititsinermi imarisai tamanut ammasuunerat erseqqissassallugu pingaaruteqarpoq, PET-p tusagassiortunut oqaaseqartartua taama oqarpoq.

Siunissami tusagassiorfiit qaaqqusarniarai

- Kalaallit inuiaqatigiit paasitissallugit soqutigisaraarput. Ippassartut ittumik paasititsiniaalluta tulliani ataatsimiititsilerutta, tusagassiortut peqataanissaannut qaaqqussavagut, tassani issuaanissamut periarfissaqassapput, kalaallillu innuttaasut peqataatillugit, tusagassiortunut oqaaseqartartoq neriorsuivoq.

PET-p kalaallit nunatsinni tusagassiortut Sulisitsisuni ataatsimiinnertut ittuni qaaqqusarnissaanut pilersaarutaa, Inatsisartut Allattoqarfiani aamma Ilisimatusarfimmi sulisunut ataatsimiititsinerni qaaqqusisarnissani pilersaarutigigaa, taanna aamma ilisimatitsivoq.

Sisamanngornermi ataatsimiititsisoqarnerani inuussutissarsiornermik suliaqartut 25-t Kina pillugu paasissutissinneqarpoq, taassumalu Issittumi sillimaniarnermut politikkimut attuumassuteqarnera.

Ataatsimiinnermut peqataasup ataatsip Sermitsiaq.AG-mut ilisimatitsissutigaa, PET-p siunnersortaanit paasissutissiineq taassumunnga nutaartaqarsimanngitsoq.

Powered by Labrador CMS