Royal Greenlandip namminersortunngorsarneqarnera aallartisarneqartoq

Aalisarnermik suliffeqarfissuup Royal Greenlandip namminersortunngorsarnissaanik sulinermik siunertaqartumik, Naalakkersuisut aallarnisaaniarlutik aalajangerput.

Naalakkersuisut erlinnartuutimi annersaat tuniniassallugu piareersimannguatsiarpoq: Royal Greenland, nunarsuaq tamakkerlugu 2.500-nit amerlanerusunit sulisoqartoq.

Naalakkersuisut Siulittaasuata Naalakkersuisoqarfiani pisortaq, Søren Hald Møller, suleqatigiissitamik pilersitsinissamut suliakkerneqarsimalluni Sermitsiaq.AG-mut ilisimatitsivoq, taassuma suliffeqarfissuup Namminersorlutik Oqartussanit pigineqartup privatinngorsarneqarnissaanut periarfissat kingunerisinnaasaalu misissoqqissaassavai.

Ilulissani ataatsimiinneq

Partiit naalakkersuisoqatigiit siuttui Ilulissani Demokraatit siulittaasuat Niels Thomsen peqatigalugu ataasimiimmata, Aalisarneq pillugu ataatsimiititaliarsuup sulineranut tunngaviusussamik nassaarniarnermi sammisaq saqqummeriasaarpoq.

Namminersorlutik Oqartussat ingerlatseqatigiiffiisa ilaasa privatinngorsarneqarnissaat tamatuma kingorna ataatsimiititaliarsuarmut siunnersuummut ilanngunneqarput, kisianni piffissaq kingulleq atorlugu peerneqarlutik.

Marsip arfineq-pingajuanni Naalakkersuisut ataatsimiinnerminni aalajangerput, ”Royal Greenlandip namminersortunngorsarneqarnera pillugu suliassaq ataatsimiititaliarsuup suliassaanit peerneqarpoq suliassaqarfimmillu oqartussaasumut inissinneqassalluni”.

Suliassaqarfik oqartussaasoq uani pineqarpoq Naalakkersuisup Siulittaasuata Naalakkersuisoqarfia, tassanngaanniit Namminersorlutik Oqartussat ingerlatseqatigiiffii tamarmik aqunneqarput.

Angusat kusanartut

Royal Greenland ukiuni kingullerni Mikael Thinghuusimit ingerlanneqarnermini kusanartunik angusaqartarpoq. Sulisut 2.533-t suliffeqarfissuarmi sulipput, nunarsuaq tamakkerlugu tunisassiorfiit 49-t, taakkunannga 38-t Kalaallit Nunaanniipput. Kalaallit Nunaanni sulisut 1.400-t sulisorineqarput, ukiumut nalunaarummi Royal Greenlandip saqqummersitaani kingullermi tamanna atuarneqarsinnaavoq.

Ukiumut 2017-imut nalunaarummi atuarneqarsinnaavoq, akileraareernermi sinneqartoorutit 129 millionit koruuniupput, aningaasaatillu 1,416 milliardit koruuniupput.

Politikkikkut oqallisaasoq

Royal Greenlandip namminersortunngorsarneqarnera maanna politikkikkut oqallinnermi oqaluuserineqarluartareerpoq. Taamaattorli suleqatigiissitamik namminersortunngorsaanissamik qulaajaasussamik pilersitsisoqarnikuunngilaq.

Powered by Labrador CMS