RAL: Pituffimmi isumaqatigiissut taamaattumik pissarsiarinngilarput

Royal Greenlandip ilaatigut tupaallannaqisumik issuttumi ingerlatsisinnaanerata naammannginnera, umiarsuaatileqatigiiffiup Thule Air Basemi imaatigut nassiussanik suliarinnittussatut isumaqatigiissut pissarsiarinnginneranut pissutaasut ilagaat, umiarsuaatileqatigiiffik ilisimatitsivoq.

Verner Hammeken

Amerikami illersornissamut ministereqarfiup amerikamiut ingerlatsiviat Schuyler Line Navigation Company ukiuni tullerni marlunni US Air Forcemut imaatigut nassiussanik Pituffimmut ingerlatsisussatut toqqarsimavaa.

Amerikamiut aalajangernerat pakatsinartorujussuuvoq, Royal Arctic Linep sooq toqqarneqarsimannginnini tusagassiuutinut nalunaarummi ilisimatitsissutigaa.

Ingerlatsisinnaanera naammanngitsoq

- Ilaatigut nalilerneqarpoq Royal Arctic Linep issittumi tassani ingerlatsisinnaanerminut tunngavigisai naammanngitsut, umiarsuaatileqatigiiffimmi pisortaq Verner Hammeken, tusagassiuutinut nalunaarummi ilisimatitsivoq.

Pissutaasup aappaa tassaavoq, Royal Arctic Linep neqeroorutaata ”umiarsuarnik amerikamiunut attuumassuteqanngitsunik tunngaveqarnera. Attuumassuteqarnissaq illersornissamut ministereqarfiup ilitsersuutaani 4500.57-imi, immikkoortumi 6.4-imi piumasaqaataavoq, taamalu sullissisussanik toqqaaniarluni tulleriiaarinermi appasinnerit ilaattut Royal Arctic Line aallaqqaataaniilli inissisimalluni”.

Royal Arctic Linep ukiuni tulliuttuni marlussunni uppernarsaatit pisariaqartut teknikikkullu upalungaarsimanerit Amerikami illersornissamut ministereqarfimmut tamakkiisumi piareersimanissaat qulakkeerniarpai, taamaaliornikkut Qaanaap eqqaani pissusiviusut teknikikkullu tunngaviusut aallaavigalugit suleqatigiissinnaaneq pilersinneqarsinnaassammat, Verner Hammeken ilisimatitsivoq.

- Taamatut aalajangerneq Royal Arctic Linep aningaasatigut ingerlatsinermigut angusassatut naatsorsuutaanut sunniuteqassanngilaq niueqatigiinneq eqqarsaatigalugu teknikikkut aporfiup DoD 4500.57-ip immikkoortoq 6.4-p neqeroorutitsinnut aallaqqaataaniilli annertuumik qulartitsinera ilisimareeratsigu, Verner Hammeken ilisimatitsivoq, taassuma politikkikkut suliaq tukareersoq oqaaseqarfigeqqinnissaa kissaatiginngilaa.

Powered by Labrador CMS