Aalisarneq pillugu ataatsimiititaliarsuarmut tunngavik saqqummiussassaanngitsoq saqqummiunneqartoq
Ataatsimiititaliarsuup suliassaanut missingiut ingerlateqqinneqaqqusaanngitsoq, aalisarneq pillugu ataatsimiititaliarsuassap suliassaanik sinaakkusiisussaq saqqummiunneqarpoq, Naalakkersuisut aamma aalisarnermut naalakkersuisoqarfiup avataanit inunnut arlalinnut ingerlateqqinneqarsimavoq, Sermitsiaq.AG taama tusagaqarpoq.
Missingiut aalisarnermut naalakkersuisoqarfiup naalakkersuisoqatigiit partiivini siuttunut aamma partiimut tapertaasumut Demokraatinut saqqummiussassarigaa takuneqarsinnaavoq. Ataatsimiinneq pingasunngormat kingullermi Ilulissani ingerlanneqarpoq.
Saqqummiussassaq qulinik quppernilik
Saqqummiussaq naalakkersuisoqatigiit aamma minnerunngitsumik partii tapertaasoq Demokraatit naammagisimaartinniarlugit qularnanngitsumik immikkoortut ilaanni allanngortinneqarsimasussaq, qulinik qupperneqarpoq.
Illuatungiuliuttut, KNAPK aamma Sulisitsisut ataatsimiititaliarsuup ilusilersornissaanut sulinermi sunniuteqarsinnaannginneq tamarmik naammagisimaarnagu oqariartuutiginikuuaat.
Saqqummiussanu februaarip 11-annik ullulerneqarsimasumi, aalisarneq pillugu ataatsimiititaliarsuup suliassai allattorneqarsimapput.
Qulequttat
Uku qulequttat maanna saqqummiunneqartumut tunngaviupput:
- Aalisarneq pillugu Ataatsimiititaliarsuup atuunnerani siunertat aamma sinaakkutit
- Ataatsimiititaliarsuup suliassaa aamma angusaa
- Suliniut 1: Pisuussutit atorneqarnerinut sinaakkutinik aqutsineq
- Raajarniarnermi sinerissami imartanilu assigiinngitsuni killit nalilersorneqaqqinnerat
- Kalaallit Nunaata sineriaani aqutsiveqarfiit immikkoortiterneqarneri
- Aalisarnermik nakkutilliineq nukittorsarlugu
- Suliniut 2: Piginnittunut aamma pisassiissutinut tnngasut kiisalu aningaasaliineq
- Raajarniarnermi pisassiissutit piginnittuinik naatsorsuineq
- Aningaasaliinissamut aamma pilersaarusiornermut sinaakkutit
- Umiarsuit tunitsiviit atornissaannut tunngaviit
- Pisassiissutinik atuineq
- Umiarsuuatinik tulluarsaaneq aamma kinguaariit nikittarnerat
- Aningaasanik annaaneqaratarsinnaasunik pissarsisinnaaneq
- Suliniut 3: Unammilleqatigiinnermik qulakkeerinninneq aamma aalisarnermik inuussutissarsiornermi piginneqataassutsit siammarneqarnerunissaat
- Inuusuttut aalisartut inuussutissarsiornermut ilanngussinnaanerat
- Kalaallit Nunaata kitaani raajat pisassiissutigineqartut tamarmik agguataarneqarnerat
- Killiligaanngitsumik raajarniarsinnaanermut akuersissutit taamaatinnissaannut kalerriuteqarnissamut killigititaq
- Suliniut 4: Aalisarnermi pisuussutit atorneqarneranni nalinik qaffatsitsineq
- Aalisarnermi inuttat kalaallit amerlanerusut
- Misileraalluni aalisarneq
- Aalisarnermik inuussutissarsiornerup aamma suliffeqarfiit allat ineriartornerisa akornanni ataqatigiinneq
- Aalisarnermik inuussutissarsiorneq pillugu paasissutissat
- Suliniut 5: Ataatsimiititaliarsuup siunnersuutaanit suliat aningaasaqarnikkut aamma allaffissornikkut kingunissai
- Aalisarneq pillugu Ataatsimiititaliarsuup suliaata inernera
- Aaqqissuussaaneq, piffissaliussaq aamma isumalluutit
Siulittaasoq eqqartuussissuserisoq
Siunnersuummi allannguuteqarsinnaasumi atuarneqarsinnaavoq, Kalaallit Nunaanni eqqartuussissuserisoqarfimmi eqqartuussissuserisumik ataatsimiititaliarsuarmi siulittaasussamik toqqaasoqarnissaa pilersaarutaasoq.